Tripura-in neighbourhood Class kalpui dawn

Tripura sorkar chuan hripui leng vanga zirna in khar a nih chhunga online class kalpui mekah, thingtlang lamah cheng, televi­sion leh mobile phone nei ve lo zirlaite tan neighbourhood class kalpui a tum. 

Neighbourhood class hi August 20 aṭangin kalpui ṭan a ni ang. March thlaa lockdown puan a nih aṭang khan, state sorkar chuan cable TV network leh mobile phone hmangin zirlaite tan virtual class a kalpui ṭhin a ni. Mahse official-te chuan Education Department-in zirchianna a neihah, zirlai zawng zawngte phone leh TV an neih vek loh avangin an zawm ve vek thei lo tih hriat a nih thu an sawi a, hei vang hian hmalakna thar siam an tum leh ta a ni. 

Education minister Ratan Lal Nath chuan district zawng zawngah survey hi neih niin, zirlai zinga 29% chuan mobile phone an nei lo a, 44% chuan television an nei lo bawk tih hriat a nih thu a sawi. "Heng zirlaite hian online class neihte hi an zawm ve theih loh avangin neighbourhood class kalpui hi sorkarin a rel ta a ni," a ti. 

Neighbourbood class hi school bula awm, pawn lam hmun remchangah neih a ni ang a, zirtirtu pakhatin naupang panga chin zel a zirtir ang. Heng hmunah hian social distancing dan chu khauh taka kenkawh a ni bawk ang. Zirtirtu pakhatin ni khatah group pahnih zel zirtirin, darkar hnih tal a zirtir tur a ni. Neighbourhood class hi class 3-12 inkar tan a ni ang. 

Class neihna tur hmun hi headmaster-in midangte rawnin a thlang ang a, school thuneitute chuan sahbawn leh tuite an chhawp bawk ang. Zirlai khawsik leh khuh nei erawh chu class-ah hian an awm phalsak an ni lo ang. 



Share this Post

Login to comment
No Comments