Xavi hoa Barcelona - eng tak ang maw?

January thla khan Xavi-a'n Barcelona a chhuahsan tur thu a sawi a, kum khat contract la nei mah se club aṭanga thlawpna a hmuh ṭhat tawk loh avangin Spanish coach hian a puanthuah tel a, a club hmangaih kalsan mai chu thil fuh ber niah a ngai.

Mahse, tun hnaiah Xavi-a'n a rilru sawh sawnin, Barcelona-a a cham zel tur thu a sawi a, he thu a sawi hnua an match hmasa ber chu zanin dar 12:30 hian an khel dawn a, Valencia an mikhual ang.

Barcelona hian El Clasico-ah Real Madrid chu 3-2 a an ngam loh avangin champion beiseina a bo tawh tiin a sawi theih a, hemi hnu lawkah Xavi cham tur thu an hria - Spanish coach-in hotute thlawpna a hmu a, an thlawpna hnuaiah eng ang takin nge a naute a kaihhruai dawn, tih hi hmuh châkawm a tling.

Beiseina

Xavi-a'n season hmasa lawk khan league-ah Barca a champion pui a, Barca tihawm renga mawiin 'La Masia' chhuak player a chhawr nasa bawk - Catalan club hian khawvel huap pawha player naupang, beiseiawm tak tak an kawl nual.

Hei vang hian mi tam takin Xavi hian Barca nihna a phawk chhuak ṭha tawkah an ngai a, chhuak mai tur anga sawi thawm a awm chu an ui a, mi tam takin Barca thuneitute an dem.

Xavi hian Barca a chhuahsan chhan chu thlawp a hlawh loh vang a nih thu a sawi a, club-in an ṭan tawk loah a ngai a, hmachhawp mumal tak an nei lo niah a ngai bawk. Barca lam lahin 'Chelh ta nge' an ti bik chuang lo.

A tawpah chuan

Mahse, Xavi hian a chhuah tur thu a sawi hnuah league match 10 a zawnin an tlawm lo a, kar hmasa lawka 3-2 a Real Madrid an ngam loh hma kha chu tlawm an nei lo. Hei vang hian Barca thuneitute pawhin chelh an duh leh si!

Barca president Joan Laporta chuan Xavi hi cham turin a ngen a, a thutlukna siam hun dawhthei takin an nghak tel a, coach dang pawh an zawng lawk duh lo - a tawpah Xavi-a'n a rilru a thlak a, Barca-ah a cham dawn.

Laporta chuan, "Season laihawlah a chhuah tur thu a sawi kha chu kan hre vek ang. Mahse, vawiinah chuan he hmuna cham tur hian thutlukna a siam a, kan hmachhawpah te rinna a nghah thu min hrilh," a ti.

Engtin nge?

Xavi hian June 2025 thleng hi contract a nei sa hrim hrim a, tuna a cham tur a tihchian hian contract a pawtsei lam ni loin a contract neih sa ang kaltlangpui turin thutlukna a siam ve chauh tihna a ni zawk.

Nilaini khan Xavi hi Laporta inah Laporta nen hian an inhmu a, an hmachhawpte an sawi dun. Season thar chu Xavi hian a enkawl ang a, season tawpah an beisei ang result a awm loh chuan an inṭhen ang.

Hetih hunah hian coach langsar, Manchester City boss Pep Guardiola, Paris St-Germain coach Luis Enrique leh Arsenal manager Mikel Arteta ten an contract an lo hmang zo tawh ang a, a tu emaw ber hi Barca-in lakluh an tum dawn.

A hunah tak

Xavi-a'n Barca a enkawl chhunzawm dawn a, tun season-ah chuan beisei tur a awm tawh lo. League-ah Real Madrid an thlau hret a, Champions League-ah an tla tawh a, nomawi tel loin season an khar dawn.

Mahse, zanin hi a cham tur a chian hnua Barca a kaihhruai leh hmasak ber tur a ni a, mi tam takin an ngaihven sawt dawn a, player la pangngai reng mah se, result-in ngaihven a hlawh lehzual ang.

Chutihrual chuan Valencia hi season thara European football khelh la beisei ve reng an ni a, mahni muala khel tur mah ni se, Barcelona tan hna a awlsam dawn lo.

Champion an hnaih

Barcelona elpui Real Madrid-in champion an hnaih zel a, Zirtawpni zan khan Arda Guler-a goal hmangin Real Sociedad 1-0 in an hneh. Turkish midfielder talent nei ṭha Guler hian inhliam vangin kuminah a la inlan tam lo a, La Liga-ah match ruk chauh la inlan mah se goal hnih a khung.

Carlo Ancelotti hote hian match 33 aṭangin point 84 an hmu tawh a, match nga khelh tur la awmah anmahni hnaih bertu Girona aiin point 13-in an hmu tam zawk. Real hian champion turin point nga chauh hmuh a ngai tawh a, an dinhmun a ṭhat tawh avangin Champions League lamah insawrbing a ṭul tawh zawk ang.