Assam-ah hripui vanga thi 94 tling tawh

Hmarchhak state zinga coronavirus kai tamna leh hri vanga thi tamna ber, Assam-ah hri kai leh thi an la pun  belh zel. 

Ningani khan Assam-a hri kai zinga pahnih, Kamrup Metro district leh Darrang district mi an thih belh leh a, anni nen an state-a hripui vanga thi hi mi 94 an tling tawh a ni. 

Hemi ni vek hian state chhungah hri kai hmuh chhuah belh mi 2,112 an awm leh a, an zinga mi 283 chu Guwahati khawpuia mi an ni. Hri kai hmuh tawh hi mi 38,407 an tling tawh a, enkawl dam 27,832 awm tawhin hri kai mek hi 10,478 an la awm. 

Health minister Himanta Biswa Sarma chuan hripui leng vanga khuahkhirhna siamte chu August 15 thleng hman chhunzawm a la ni dawn tih a sawi. Sorkar laipuiin Unlock 3 kalpuina tura kaihhruaina te tichhuak mah se, state leh UT te chu ṭul an tih anga kalpui turin thuneihna a pe a ni. Hei vang hian Assam sorkar pawhin an state chhunga zan lama darkar 12 chhung curfew puan, urban area-a kartawpa lockdown hman leh district  inkalpawh khapnate chu hman chhunzawm zel a la tum.



Share this Post

Login to comment
No Comments