Lajong hmaah East Bengal an tlawm

Season hmasa I League-a an him nan Shillong Lajong-in East Bengal an sawp tawh a, tun season-a I League-a an inhamtan chhan pawh an match hnuhnung bera East Bengal an hneh vang tho a ni.

Meghalaya club hian Kol-kata club lian an ngam laklawh a, Federation Cup aṭangin an pet chhuak leh ta. Nilaini zan khan Shillong Lajong hian Barasat Stadium-ah East Bengal hi 2-2 in an inhnehtawkpui a, an khelmualah 2-1 a an lo hneh tawh bawk avangin inkhel pa-hnih belhkhawmah 4-3 a hnehna changin semifinal an lut.

Shillong Lajong-in I League an khelh hmasak ber kum 2010 khan Federation Cup final an lo lut tawh a, East Bengal hi hneh loin an tla. Kum ruk a liam a, Shillong Lajong-in phuba an la ta!

Tute nge khel?

Shillong Lajong tan dan pangngaiin Mizo tlangval Isaac Vanlalmalsawma leh Samuel Lalmuanpuia ten inkhel bul an ṭan a, Zodingliana Tochhawng erawh exam turin Aizawlah a haw.

East Bengal tan a hliam dam hnuah Lalrindika Ralte chuan hmun pawimawh chan chhunzawm zelin inkhel bul a ṭan a, first leg-a inkhel bul
ṭan S. Malsawmtluanga erawh bench lamah dah niin Sanju Pradhan chuan Mizo tlangval hmunruak hi a luah.

Lajong an vannei

East Bengal-in chak tur chuan goal khung an mamawh tih hriain inkhel ṭantirh aṭangin Shillong Lajong goal-ah an nawr nghal a, Meghalaya club defender-te an talbuai teuh ṭhin hle.

Chance nei hmasa zawk erawh Lajong an ni a, Hnahthial rawlthar Isaac Vanmalsawma'n ṭha taka ball a tlanpui hnuah Fabio Pena tan hun duhawm a siamsak a, mah se Brazilian striker hian a hun ṭha neih goal-ah a chantir thei lo.

Kolkata club tlarhmaten Lajong box chhungah penalty hmuh inbeisei ṭhin mah se referee-in an ngaihdan a ṭawm-pui lo a, penalty hmu hmasa zawk chu Lajong an ni.

Minute 17-naah Bipin Singh-a ball cross chuan Dee-pak Mondal-a kut a fuh avangin East Bengal-in penalty an chawi a, penalty pettu Pena-a'n a pet sual lo. Lajong-in khual-mualah 1-0 in hma an hruai.

Didika goal class

East Bengal-in awlsam taka tlawm bik an tum lo. Goal an chhuah aṭangin minute ruk a liam hman chauh tihin penalty an hlawh chhuak ve nghal a, Nigerian striker Ranti Martins-a'n an si phurh sutna turin a khung nghal.

Kolkata club-in semifinal lut tur chuan goal hnih dang khung an la mamawh tih hre rengin Lajong an nawr chhunzawm a, minute 37-naah Mizo tlangval Lalrindika Ralte a inlar.

Lunglei tlangval hian South Korean striker Dong Hyun-Do nen mawi taka ball an inpek kual hnuah goal danglam leh mawi bik a khung a, East Bengal hma a hruaipui.

Inngam tawk

Second half-ah Lajong-in away goal hlu tak hmangin an chak thei tih hriain an nawr a, Ulliams-a ball pet ṭha tak chu Rehenesh-a'n a lo dang hman. Fabio Pena-a'n chance a neih chhunzawm ve leh a, mah se Lajong striker ball tauh hian post a per.

East Bengal tlarhma an awm mai mai bik lo, Sanju Pradhan-a ball cross chuan Lajong player kut a per niin lang mah se referee-in penalty a pe lo a, substitute bench aṭanga tlan lut Bernard Mendy chuan Ranti Martins ball siam ṭha tak chu a volley over bakah Do Dong-Hyun a ball siamsak chu a tauh over bawk.

Exra Time

Lajong hian an mualah East Bengal hi 2-1 in an hneh tawh a, Barasat Stadium-ah minute 90 chhungin mualneitu 2-1 in an chak ve bawk. Team pahnih an intluk tawk chiah avangin extra time khelh a ni.

Extra time khelh a nih hnuah Lajong an vannei a, Brazilian striker Uilliams chuan minute 114-naah Penn Orji ball cross chu a awma la thlain mawi takin a pet goal a, 2-2 a team pahnih inhnehtawkin inkhel hmasa nena belhkhawm hnuah Shillong Lajong hi 4-3 in an chak.

Shillong Lajong hian Fe-deration Cup semifinal-ah nizana inkhel Mohun Bagan leh Salgaocar chak zawk an hmachhawn ang.