Vanglaini - AYUSH Directorate din tura Meghalaya rawtna pawm

KHAWTHLIR

Lusûn khawhar

Liankunga (69), IAS (Rtd.) h/o Zalianthangi, Chaltlang, Aizawl chu nimin chhun dar 12:17 khan zunthlum natna vangin a thi a, nizan khan lumen niin, vawiin chawhma dar 11-ah vui a ni ang. Liankunga hi February 14, 1951-ah Khawbélah a piang a, fa pathum leh tu pali an nei. Mizoramah hna hrang hrang a thawk tawh a, kum 1981-ah police SI-ah a inziak tling a, kum 1982-ah Account & Treasury-ah assistant auditor-ah a inziak tling leh. Kum 1985-ah IAS-ah a inziak tling a, a hmain IAAS-ah tling bawk. IAS-ah hian Bihar cadre a ni a, Bihar sorkara principal secretary a nih laiin May 31, 2017-ah a pension a ni.

YMA din remti

YMA Central Executive Committee (CEC) nimina ṭhukhawm chuan, YMA branch thar pathum - Kharzawl branch (Serlui group), Halam Punjee branch (Zampuimanga group) leh Kolasib Venglai East branch-te din an remti. YMA branch pathum din thar a nih chuan YMA branch 811 a awm tawh ang.

CM-in thawh

Chief minister Zoramthanga chuan Covid-19 dona atan July-a a hlawh (basic pay) aṭanga 60% (Rs. 48,000) chu nimin khan Chief Minister's Relief Fund-ah a thawh.

Sample 100 en

ZMC Covid-19 Laboratory-ah nimin khan mi 100 velte swab sample endik a ni a, zan lamah result a chhuah beisei a ni. Sample endikte chu SRH-ZMC-a awmte bakah, Aizawl, Mamit leh Champhai aṭanga dawnte a ni.

Covid-19 vei mek ICU-ah 2 an awm

State Referral Hospital-ah nimin khan Covid-19 vei mi pathum leh rinhlelh thilah mi pathum dah luh thar an ni. SRH-ah hian Covid-19 vei mi 17 enkawl mek an ni a, ICU-a mi pahnih, SICU-ah mi pakhat leh Isolation Ward-ah mi 14 an awm. ICU-a awm pakhat zawk ventilator hmantir mek chuan hma a sawn hret a, Isolation Ward-a awm zingah khawsik leh thawhah nasa vak lo nei mi pali awm mah se, ngaihtuahawm an ni lo tih, SRH-ZMC Bulletin chuan a tarlang.

DAWNTISEI

AYUSH Directorate din tura Meghalaya rawtna pawm

Sorkar laipui chuan Meghalaya sorkarin an state-a AYUSH Directorate din tura rawtna a thlen chu a pawm tih Meghalaya health minister AL Hek chuan a sawi.

Health minister hi Ningani khan union AYUSH minister, Shripad Naik hoa video conference meeting neihah a tel a ni. Hek chuan sorkar laipuiin AYUSH (Ayurveda, Yoga and Naturopathy, Unani, Siddha and Homeopathy) Directorate din an rawtna chu a pawm thu sawiin, health department chuan Revenue department leh urban affairs department hnenah Directorate dinna tur ram pe tura ngenna pawh a thehlut tawh thu a sawi.

State sorkar chuan an state puala AYUSH Directorate din bakah, kum 2020-21 chhunga health and wellness centre 22 din belh rawtna pawh a thehlut bawk a ni.

Union ministry hian kumin kumtir lam khan ram chhung hmun hrang hrangah AYUSH Health and Wellness Centre 12,500 chuang din tum a nih thu a lo tarlang tawh a ni.

Share this Post

Login to comment

No Comments