Sorkar laipuiin sapel ṭhinte khuahkhirh turin hma la dawn

Prince William leh a nupui Princess Kate Middleton te chuan April thla tir lam khan Assam-a Kaziranga National Park chu an tlawh a, hun an hman chhung hian sapeltute chuan sanctuary-a samak ki pakhat nei chu AK47 rifle hmangin an kaphlum. He thil thleng hian ngaihven a hlawh hle a, sawizui pawh a hlawh hle. Union Minister for Women and Child Development, wildlife activist ni bawk Maneka Gandhi chuan China sorkar chu hmarchhak huam chhunga sapel ṭhin te chu khuahkhirh turin a lo ngen tawh a, sorkar laipui pawh venhimna lam khauh zawka kalpui turin a ngen a ni. Sorkar laipui chuan ramsa humhalh zual bik zinga mi Samak kahhlum a ni chu pawi an tih thu an sawi a, an ngai thutak hle tih an sawi. Kaziranga National Park chu India ram rohlu a ni a, a venhim leh hmasawnna kawngah nasa zawka ke an pen tur thu an sawi a ni.

Environment Minister Prakash Javadekar chuan Union cabinet-in South Asia Wildlife Enforcement Network (SAWEN) status a pek chu an pawm tih a sawi. He hi Union Cabinet chuan ngun takin a ngaihtuaha SAWEN member a nih chuan ramsa leh nungcha te ven leh thil sualtitute hrem kawngah chak zawka hmalak theih an inbeisei a ni. Prime Minister Narendra Modi pawhin SAWEN member nih chu a remtihpui a ni. Assam Chief Minister Tarun Gogoi pawhin Additional Chief Secretary TY Das chu Samak thah a nih dan leh sapeltute chu man chhuak thuai turin a lo hriattir tawh bawk a, pawmzam mai chi a ni lo a ti. Gogoi chuan Samak kahhlum a ni leh ta chu pawi a tih thu sawiin, special task force te chu he thil thleng chhui chiang tur hian a ti a, zirlai leh pawl hrang hrang bakah mipuite chu ramsa humhalh kawngah ṭanrual a ṭul thu a sawi a ni. Sorkar laipui hian an hmalak dan tur la sawi chiang chiah lo mah se venhimna lam chu a ngaih pawimawh hmasak rin a ni.