Harsatna paltlangtu Richarlison

Tottenham forward Richarlison chuan a hringnunah hun harsa tak a paltlang tih a sawi a, hun harsa kal tlang tur hian rilru lam enkawl thiamte a pan tih a sawi bawk.

Brazil international hian Spurs a zawm hnuah beisei a phak lo, goal khung a harsat bakah a khelh ṭhat tawk loh avangin sawisel a hlawh nasa, hei hian a nunah nasa takin nghawng a nei.

Kum 26 mi Richarlison chuan, "Player leh midangte pawhin rilru lama harsatna leh rilru hahna an nei a nih chuan mithiamte pan hreh suh se, kei chuan mithiam pan a hlutna leh ṭhatzia hi a takin ka hre tawh.

"Mahni dinhmun tawh laia au chhuak ngam lo leh hrehawm tuar, awmhmuna rilru na tak an awm a nih chuan pui tur pawhin ka inhuam, thupa ngawih bo pui chiah ka ngai lem lo," a ti.

Brazil leh Bolivia ten World Cup qualifying an khelh ṭumin Richarlison hi thlak a ni a, a mittui tla chu media hrang hrangah a darh nasa hle. Nikum September thla khan rilru doctor a pan a ni.

A hnu lamah Richarlison hian nasa takin hma a sawn tih a lang a, a nunphung pangngai bakah khelmual chhungah pawh rah ṭha a chhuah, a club tana a match hnuhnung 13 aṭangin goal kua a khung.

Everton aṭanga Tottenham a zawm tirh kha chuan, North London club tana a match hmasa 40 aṭangin goal li chauh a khung a, pound maktaduai 60 man ngawt a nih avangin sawisel a hlawh nasa hman hle.

Mahse, nikum December thla aṭang khan thil a danglam chho a, tunah chuan Premier League hmatawng hlauhawm leh hmunawm zinga mi a ni chho leh mek.

Richarlison chuan, "Tunah chuan ka club tan Premier League-ah ṭha takin ka khel leh thei ta, hei aia lawmawm hi thil dang a tam bik chuang lo ang, ṭha taka inkhelh aia nuam hi a tam lo.

"Club tan ka khelh ṭhat avangin Brazil tan pawh kohna ka dawng ve leh ta bawk, ram tana koh loh nih kha chu a hrehawm hle. Tunah chuan ka hma hun pawh hi beiseina nen hlim takin ka thlir thei leh ta a ni," a ti.

Tun international break atan Richarlison hi koh a ni a, an ram tan hian match 48 a khelh aṭangin goal 20 a khungsak tawh. Tunah chuan Copa America khel zinga tel phak tumin thapui a thawh chhunzawm ang.