Vanglaini - AP-in tangkhangte hruai haw hna chawl lailawk dawn

KHAWTHLIR

IAS sîksawi

Mizoram sorkarchuan tun hnai khan IAS pathum a sîksawi. Serchhip DC Dr Lalzirmawia Chhangte chu secretary atan ruat a ni a, Printing & Stationery leh Fisheries department a chang ang. Siaha DC Bhupesh Chaudhary chu additional secretary atan ruat niin, Cooperation department a chang ang a, Aizawl additional DC Kumar Abhishek chu Serchhip DC a ni ang.

Mi pali dah lut

Covid-19 vei rinhlelh thilah nimin khan State Referral Hospital-ah mi pali dah luh thar a ni a, an zinga pahnih chu nimin khan swab sample laka endik nghal a ni a, he thu ziah lai hian result a la chhuak lo. Mi dang pahnih chu vawiinah endik an ni ang. SRH-ah hian Covid-19 vei mi 15 enkawl mek a ni a, Makeshift ICU-ah mi pakhat awmin, mi dang 14-te Isolation Ward-ah an awm.

Lungleiah Swab test

June 28, Pathianni khan Lunglei Civil Hospital laboratory-ah Truenat khawl hmangin swab sample 30 endik a ni a, June 27-ah sample 31 endik a ni bawk a; endik zawng zawngte'n Covid-19 an kai lo tih finfiah a nih thu sorkar thuchhuah chuan a tarlang. LCH laboratory-ah hian Pathianni thleng khan sample 299 endik a ni tawh a, sample pahnih chu Covid-19 positive angin a hmu a, ZMC-a endik nawnnaah positive pakhat zawk chu negative a ni tih hmuh a ni thung.

Hnathawh enfiah

Kolasib bialtu MLA K Lalrinliana chuan nimin khan a bial Diakkawn VC area chhunga MLA-LAD Fund, Excluded Area Grant leh Mizoram Finance Commission Grant hmanga hnathawh a hmunah kalin a enfiah a, MLA fund hmanga sak Neuva Section YMA Chawlhbuk chu a chung siam danah duhthu a sam loh thu sawiin, steel structure hmanga nalh zawk leh tha zawka siamtha tur leh estimate pawh siam tha leh turin a ti. K Lalrinliana chuan bial chhung mipuite chu MLA fund an ta a ni tih hria a, fund hmanga hnathawhte ngaihven a, enpui fo turin a chah.

DAWNTISEI

AP-in tangkhangte hruai haw hna chawl lailawk dawn

Arunachal Pradesh sorkar chuan hripui leng avanga Arunachal mi, state danga tangkhangte hruai haw hna a thawh chu July 1-3 chhung a chawlsak lailawk dawn.

Itanagar Deputy Commisisoner chuan order hi tichhuakin, emergency thil bik loah chuan July 1-3 chhungin hmun dang aṭang haw an phal dawn lo tih a sawi. Hei hi Home Minister kaihhruaina hnuaia coordination meeting-a an rel a ni tih a sawi a ni. Order tihchhuahah he thutlukna hi PTC-a Banderdewa-a quarantine facility a tawt tawh thu tarlangin, June 30 aṭang chuan he hmunah hian tangkhang hawte dah belh theih an ni dawn lo tih a sawi. Mahse Lekhi-a state quarantine centre leh khunghranna atana hman hotel-ah te chuan July 4 aṭangin dah theih an ni ang.

Arunachal Pradesh-a hri kai hmuh tawh mi 177 an tling tawh a, an zinga 54 chu enkawl dam an ni tawh thung. Changlang district chu hri kai tamna ber niin mi 52 an awm a, Itanagar Capital Complex-ah mi 35 leh West Kameng-ah hri kai mek hi 12 an la awm a ni.

Share this Post

Login to comment

No Comments