Premier League title race : Match 10 chauh a awm tawh; Liverpool Vs Arsenal Vs Man City
Season tinin Premier League a hmuhnawm tulh tulh emaw tih mai tur a ni. Tun season pawh ṭum dang ang thoin a hmuhnawm leh dawn a, season liam taa nomawi inchuhtu Manchester City leh Arsenal bakah Liverpool an rawn awm belh.
Sir Alex Ferguson-a hnuaia Manchester United ropui vanglai pawh khan season li chhung an champion thei lo. Man City hi an champion leh a nih chuan Pep Guardiola hote hi a zawnin vawi li an champion dawn.
Liverpool hi an champion chuan English football inelna sang bera vawi 20 an champion-na tur a ni a, Manchester United record an nih rual dawn.
Arsenal-in kum 20 hnuah Premier League nomawi chawi theihna hun ṭha an nei a, Gunners tan nomawi hlu bik a ni dawn. Eng team pawh champion se, a hlu vek dawn a, champion turin an dinhmun a ṭha vek bawk.
Fixtures
Tun kartawp hian Etihad Stadium-ah Arsenal-in Man City an tlawh dawn a, point hloh an awm dawn. Liverpool tan hun ṭha a ni nghal thei ang. Gunners tan fimkhur a ngai dawn hle, Pep-a hote laka hnehna an chang a nih chuan point thum chauh ni loin inrintawkna an nei tel bawk ang.
Arsenal hian big 6 tia an chhiar club zingah City bakah Chelsea, Tottenham leh Manchester United te an la hmachhawn dawn. Mikel Arteta hote fixtures hi a hautak tih a chiang a, an hmachhawn hmabaka mi Spurs, Man United leh Aston Villa te hi season thara Champions League khelh tum vek an ni.
Liverpool hian nomawi chuh tura an elpui club Arsenal leh Man City te an hmachhawn dawn tawh lo. Big six zingah Man United leh Tottenham te an la hmabak a, Erik Ten hag-a hote hi FA Cup-a an hneh lohna hmun Old Trafford-ah bawk an hmachawn dawn. Season hmang ṭha zinga mi Villa nen an la inkhel dawn bawk a, hmabak awlsam chu a ni lo mah se Arsenal fixtures aiin a thlanawm zawk.
Man City tana hmabak harsa ber chu Arsenal a ni a, a dawtah chuan Aston Villa emaw Totenham emaw tiin a sawi theih ang. Pep Guardiola hote khelh hmabak hi a awlsma berah a ngaih theih a, chutihrualin tun season-ah City hi an chesual fo - champion nawn a harsa dawn.
UCL, UEL & FA Cup
Arsenal tan Premier League ringawta insawrbing theih a ni ta lo, UCL quarterfinal-ah German champion Bayern Munich nen an inhmachhawn dawn. Season liam ta khan Premier League chauha insawrbing chungin Man City an umpha ta lo kha a ni a, Bayern nena an inkhel tur hian nghawng a nei thei ang.
Liverpool-in League Cup nomawi an chawi tawh a, FA Cup-ah Man United an hneh loh avangin hnual viau mah se Premier League nomawi chawi phah theihna a ni zawk. Chutihrualin Reds hian Europa League quarterfinal-ah Atalanta an hmachhawn dawn a, hna a hautak phah ang. FA Cup-a Man United an hneh loh chhanah kar laihawla Sparta Praque an hmachhawn kha, a mawhpuh theih tlat.
Man City-in season liam ta khan UCL, Premier League leh FA Cup nomawi an chawi a, tun season-ah treble champion nawn an tum. UCL-ah City hian Real Madrid an hmachhawn dawn a, FA Cup semifinal-ah Chelsea nen an inkhel dawn. Premier League khelh hmabak chauh thlir chuan Man City fixtures nem berin lang mah se UCL leh FA Cup an la neih miau avangin an fixtures hi a hautak ber zawk hial ang.
