Manipur chief minister N Biren Singh chuan an state-ah Covid-19 kai an pun belh zel avangin inkharkhipna kalpui mek chu July 1 aṭangin ni 15 dang, July 15 thleng pawhsei a ni dawn tih a puang. 

Lockdown avanga mipuite harsatna an tawh hrang hrangte pawh an hriatthiampui tih sawiin, CM chuan hei vang hian kaihhruaina ṭha tak hnuaia inter-district bus service tir tum a ni tih a sawi. Mahse public transportation dang erawh chu lockdown chhung hian an chhuah phal a ni lo ang. 

Manipur-ah hian hri kai hmuh tawh hi mi 1,185 an awm tawh a, an zinga 455 chu enkawl dam an ni tawh a ni. Pathianni khan sample test zinga hri kai mi 93 hmuh belh an ni. An vai hian state dang aṭanga haw vek an ni. 

Pathianni vek khan hri kai enkawl dam, damdawiin aṭanga chhuah tir mi 23 an awm bawk. Hri kai enkawl dam hi awm reng mah se, hri kai hmuh chhuah thar an pun chak avangin recovery rate pawh 38.39% ah a tlahniam leh a ni. 

CM chuan an state-a  hri kai hmuh zinga frontline worker pasarih tih loh chu state dang aṭanga haw an nih thu a sawi. Frontline worker Covid-19 kai zingah hian Bishnupur district hospital-a medical officer pahnih pawh an tel. Hri kai hmuh chhuah zingah hian Delhi/NCR aṭanga haw mi 621, Mumbai aṭang haw mi 155 leh Chennai aṭanga haw mi 131 an tel tih CM chuan a sawi. 

State chhungah hian hri kaite enkawlna tur Covid-19 care facility hrang hrang, RIMS leh JNIMS telin khum 1,000 chuang a awm a ni. District hrang hranga containment zone huamchhungah quarantine centre 130 a awm bawk.

Singh chuan hri darh zel tur venna atan sample test a tam thei ang neih tuma hma lak mek a nih thu leh, ni khatah sample 2,600 an test theih tawh thu a sawi. Sample an lakte pawh lak aṭanga darkar 24 chhungin an test thei zel tawh tih a sawi a ni. 

Share this Post