Vanglaini - Bethany Hospital Shillong hawng leh ta

KHAWTHLIR

Zan dar 7- zing dar 7 Curfew hun tisei

State Disaster Management Authority hnuaia State Executive Committee chairman Lalnunmawia Chuaungo, chief secretary chuan Mizorama inkhàrkhip thawh lina inkaihhruaina ṭhenkhat tihdanglam a nih thu a puang. Hriattirnaa a lan danin, AMC huam chhung leh district headquarters bika dawr hawn phal zinga dah tawh, mall chu paih a ni a, hawn phal a ni tawh dawn lo. Zan lama curfew hun - zan dar 7 aṭanga zing dar 7 chu tihsei niin, curfew tàwp hun chu zing dar 7 a ni tawh ang.

Thisen pe

May 23, Inrinni khan Zonuam Bial KṬP-te'n an bial KṬP kum 10 tlin pualin Synod Hospital-ah thisen unit 48 an pe a, petute mipa 37 leh hmeichhia 11 an ni. Aizawl Civil Hospital-ah pawh Armed Veng Branch KṬP-te'n thisen unit 34 an pe a, petute mipa 31 leh hmeichhia pathum an ni a; Upper Republic Branch KṬP pawhin unit 27 an pe a, petute mipa 20 leh hmeichhia pasarih an ni.

Nupui hlui vit hlum

Lalruatzela (52), Saitual Chawnpui Veng

chuan a nupui hlui Lal-

ṭhatluangi (52), Saitual Chawnpui Veng tho chu nimin khan a vit hlum. Saitual police-te aṭanga thu dawn danin, Lal-

ṭhatluangi hi an in bula a ṭhiannuin a sam ṭuak a pawhsak laiin nimin chawhma dar 11:45 vel khan Lalruatzela'n a vit a, damdawi-in thlenpui a nih hnuah, a hliam tuar loin chawhnu dar 1:15 velah a thi. Lalruatzela hi police-in an man tawh a, Aizawlah lak tur a ni.

Mi 94 awm

Mamit district-a sorkar quarantine centre-ah May 23, Inrinni thleng khan mi 94 an awm a, mipa 63 leh hmeichhia 31 an ni. SSA boys hostel-ah mi 18, Tourist Lodge-ah mi 32, Polytechnic-ah mi 20, BDO Rest House, Zawlnuamah mi pasarih leh West Phaileng H/S-ah mi 17 an awm mek a ni.

Hmai tuamna sem

Mizoram Bharat Scouts & Guides-a State Council member leh unit leader te, Rovers & Rangers leh Scouts & Guides-te chuan May 23, Inrinni khan Aizawl khawpuia chawhmeh zawrhna hmun 10-a chawhmeh zuarte hnenah hmai tuamna 1,000 an sem.

DAWNTISEI

Bethany Hospital Shillong hawng leh ta

Meghalaya khawpui, Shillong-a Bethany Hospital chu coronavirus kai hmuh a nih avanga ni 40 chhung khar a nih hnuah Inrinni khan hawn a ni leh ta.

He hospital dintu, Dr John L Sailo Rynthathiang chu Covid-19 vang hian April 15 khan a thi a ni.

Chief minister Conrad K Sangma chuan Bethany Hospital hawnna hun hi hmanpuiin, Dr John Sailo zahna a hlan nghal bawk. CM chuan Dr Sailo zahna an lantirna tur sang ber chu state mipuite tana a rawngbawlna hna an chhunzawm zel chu a nih thu a sawi. Bethany Hospital team chungah lawmthu a sawi bawk.

Hospital neitu, Dr John Sailo-in Covid-19 a kai tih hmuh chhuah a nih hnuah Bethany Hospital hi khar tir a ni. Ni 40 khar a nih hnuah District Medical & Health Office, East Khasi Hills; Shillong Municipal Board leh Meghalaya State Pollution Contral Board-in in an endik a, hemi hnu hian state sorkar chuan hawn a phalsak ta a ni.

Shillong-a Bethany Hospital hi kum 2002-a din niin, khum 175 a awm a ni.

Share this Post

Login to comment

No Comments