Ṭhalaite hmasawn nan Meghalaya sorkar leh 1M1B Foundation thawk dun dawn

Meghalaya sorkar leh 1M1B foundation-te chuan an state chhunga a hmasa ber ni tura Green Skills Academy, Shillong-ah din a nih theih nan thawh dunna thuthlung an ziak.

An project hian a tum ber chu ṭhalai hna zawng mekte chu zirna in an chhuahsan hnuah hna ṭha tak hmu thei tura thiamna pek a ni a, hna hmu tura zirtir bakah an hriselna pawh ngaih pawimawh tel a ni bawk ang. 1M1B Green Skills Academy hi college zirlai kum 18 pel tawh tana buatsaih a ni dawn a, ṭhalaite thiamna leh rilru puthmang chu khawvel mil zela chher hriam a tum dawn a ni.

Meghalaya chief minister Conrad Sangma chuan,"1M1B nen thawkhoa, Green Skills Academy kan din thei tur hi ka lawm takzet a ni, he hmalakna hian ṭhalai tam tak hman tlaka a chherchhuah ngei kan beisei a ni" a ti. He thil hian a tum chu college zirlaite chu chhawr tlak ni tura chher hriam bakah leilung humhalh kawnga tihdan tlo (sustainable practrice) an neih theih nana zirtir a ni, hei hi India rama a pahnihna tur chauh a ni.

Sorkar leh 1M1B thawh dunna hian kum 2029 hmain Meghalaya state chhunga ṭhalai nuai 1 chuang zirtir hman a tum dawn a ni. Zirlai zinga ti ṭha zual mi 10 chu kum tin thlan chhuah an ni dawn a, chung mite chuan kum tina New York-a neih ṭhin 1M1B summit chu an chhim ṭhin dawn a, an hmalaknate an tarlang ṭhin ang.