Meghalaya eptu party, Congress MLA Charles Pyngrope chuan Covid-19 leng vanga sorkar sum dinhmun a tlakhniam nasat avangin MLA te hlawh chu 50% a tihhniam a rawt. 

Pyngrope hian Assembly-a budget session chhunzawmna, Nilainia an neihah a sawi chhuak a ni. 

Meghalaya MLA-te hian a hmain kum khat chhung atan an hlawh aṭanga 10% chu Chief Minister's Relief Fund-a chhunluh turin thutlukna an lo siam tawh a ni. 

"10% chauh pek hi a tawk lo a, thla khatah kan hlawh aṭangin Rs 6,000 chauh kan pe tihna a ni. Hei vang hian state sorkar kan puihna turin kan hlawh aṭanga 50% kan pek hi a ngai a ni," tiin Congress MLA chuan a sawi. Hemi rual hian sorkarin sorkar hnathawk, group B, C leh D te hlawh a kima pe turin a phut bawk. 

State sorkar hian hripui leng vanga sum lama harsatna a tawh avangin lockdown chhung chuan chief minster, deputy chief minister leh minister-te bakah, All India Service officer leh central service officer-te hlawh 50% chu pekchhuah a ni rih dawn lo tih a lo sawi tawh a ni. Hei bakah hian health, home (police) leh home (civil defence and home guards) department-te huam tel loin, department dang zawng zawnga Group A leh B officer-te hlawh 35% leh, Group C staff te hlawh 25% chu pek tel an ni rih dawn lo tih a sawi bawk. 

Pyngrope chuan sorkar hnathawk tam tak chu loan rulh ngai an ni tih sawiin, an loan rulhna an pek hnuah sorkarin an hlawh a la hrensak ṭhen chuan hlawh lak tur mumal nei loin, sum lamah harsatna an tawh phah zawk dawn a ni, a ti. 

Share this Post