CBI-in Manipur buaina kaihhnawih case 29 chhui dawn

Manipur governor Anusuiya Uikey chuan 12th Manipur legislative assembly budget session ṭan nia thu a sawiah Manipur buaina chungchang a sawi lang a, buaina kaihhnawih case 29 chu Central Bureau of Investigation (CBI) kutah hlan a nih thu a sawi a, hei bakah National Investigation Agency (NIA) chhui turin thubuai pakhat hlan a ni bawk a ni, a ti. Heng thubuaite hi ṭan lam nei lo leh langtlang taka chhui a nih theih nan CBI leh NIA kutah hian dah a nih thu Governor chuan a sawi.

Governor chuan FIR dang pali chu CBI kuta hlan leh tum mek a nih thu leh, NIA chhui chian turin thubuai dang panga pek tum mek a nih thu a sawi bawk. Tualchhung buaina chhuak avanga nunna chan chhungte hnenah state sorkar chuan zângnadawmna, Rs nuai 10 pe turin ruahmanna a siam tih sawiin, a dawng thei turte chu uluk taka enfiah an nih dawn thu a sawi.

Anusuiya Uikey chuan an state chhunga buaina chhuak avangin mi 219-in nunna an chan tawh tih a sawi. "Hnam leh hnam inkara buaina a chhuah hnuah FIR 10,000 chuang police station hrang hrangah ziah luh a ni tawh a, rinhlelh thilah mi 1,87,143 chuang police-te'n an man tawh a, thil an tisual ngei em tih enfiah niin dan an bawhchhiatna hmuh mai a nih loh avangin chhuah leh vek an ni tawh" a ti.

Governor hian an state buaina tihziaawm a nih theih nana sorkar laipui hmalak tawhnate a tarlang tel bawk. Sorkar laipui hian remna leh muanna a awm theih nan Manipur-ah sipai tam tak an tir lut tawh a, CRPF company 119 leh Army company 140 lai an tir lut tawh a ni. Uikey chuan venhimna kenkawh kawngah state force-te pui thei turin central force-te chu state chhunga hmun hrang hrangah dah darh an nih thu a sawi lang bawk.