Manipur-ah Covid-19 kai mi 25 awm tawh

Manipur-ah Nilaini zan khan mi panga in hri an kai tih hriat belh leh a ni a, Nilainia hri kai hmuh chhuahte hi an vaiin 16 an tling ta a ni. Anni nen hian Manipur-a hri kai hmuh hi mi 25 an tling tawh. Hri kai hmuh chhuah tharte  hi May 14-a rel hmanga Chennai aṭanga hawte vek an ni. 

Manipur-a Covid-19 kai zinga 15 chu Churachandpur district ami an ni. Hri kai zingah hian nausen ni 23 chauha upa pawh a tel. 

State pawn aṭanga hawte zingah hri kai hmuh chhuah belh zel a nih avangin state sorkar chuan hri darh tur venna atan khuahkhirhna khauh zawkin a kalpui thar leh a, hri kaite nena inzawmna neite pawh chhui zui nghal zel an ni.

State sorkar chuan mipuite chu chiai lo tura chahin, haw tharte pawh quarantine centre-a lo awmsa tawhte nena awm ho tir an ni tawh dawn lo tih a sawi. Rel leh motor hire hmanga Manipur mi, hmun danga tangkhang haw hi mi 10,000 chuang an awm tawh a ni. 

Assam-ah pawh Covid-19 kai hmuh chhuah belh zel an ni a, nimin thleng khan an state-a hri kai hmuh tawh zat hi mi 191 an tling tawh. 

Health minister  Himanta Biswa Sarma chuan hri kai hmuh chhuah tawh zinga 48 chu enkawl dam an ni tawh tih sawiin, mi 134 enkawl mek an ni. He hri vang hian mi pali an thi tawh tawh a, hri kai hmuh chhuah zinga pathum chu state dangah an haw tawh bawk a ni. 



Share this Post

Login to comment
No Comments