Europa League: De Rossi tan fiahna hautak

Daniele De Rossi-a'n a hringnuna pawi a tih ber a lo sawi tawh chu, "AS Roma tana ka career vawi khat chauh ka hlan thei hi a ni," a ti a, theih ni se, pian nawn a, AS Roma tan bawka a career hlan leh a duh thu a sawina a ni.

Mahse, pian nawn kher a ngai lo e - hun bite her danglam tir a, mihring nunna chunga roreltu chuan De Rossi tan hun ṭha danglam bik a her chhuah tir a, AS Roma legend hian a career vawi hnihna chu Roma tan a hlan leh ta.

Jose Mourinho ban a nih hnuah De Rossi hi coach atan Italian club-in an la lut a, a match hmasa pathumah hnehna a chanpui nghal vek - mahse, engtiklai pawhin kawng a mam reng thei lo a, insawh a ngaih ve chang a awm ṭhin.

Roma hian an league match hnuhnung berah Inter Milan an hmachhawn a, 4-2 in an tlawm. Rei pawh chawlhna hun an neih hmain Europa League knockout khelh a ngai zui a, Roma fapa rangkachak De Rossi tan a hmaah fiahna hautak chhawpin a awm - zanin dar 11:15 hian Feyenoord an lenchilh dawn.

Chona chu

Europa League-ah group hma-hruaitute chu round of 16 khel turin an tling nghal ṭhin a, group tina pahnihnate erawhin knockout round playoff an khel dawn thung - he double leg inkhelah hian an chak chauhin round of 16 an lut ang.

Jose Mourinho-a'n ban tawk mah se, 2021-22 season khan AS Roma hi Europa Conference League-ah champion nomawi a chawipui a, kum 2008 Coppa Italia champion nomawi an chawi hnua an champion leh hmasak ber a ni.

Hei vang hian Roma fans tam takin Mourinho an âtchilh a, season hmasa khan Europa League final a hruai thleng bawk. Serie A lamah Portuguese manager hian an duhthusam thlenpui lo mah se, Europe-a a hnathawh erawh sawi nep theih a ni lo.

He hnathawh ropui chhunzawm hi a harsa ang tih a chiang a, team ṭha Feyenoord ber kher an hmachhawn dawn avangin De Rossi tan hna a hautak lehzual - zaninah he inkhel en tum hian fan-ten an mit an len dawn.

Hei le Roma

De Rossi-a'n mipui vantlang hriatah Mourinho a ṭan ṭhin a, chuvang chuan a tihdan apiang a thlawp tihna erawh a ni lo. Roma a enkawl rualin Portuguese coach hman ṭhin 3-5-2 formation chu a hawisan a, 4-3-3 in a naute a rem nghal.

Hei hian mual vei lam sirah Stephan El Shaarawy tan duhthala zalenna hawnsakin, a tlan chakna chu goal nawr nan an hmang tel nghal a, mual ding lamah Paulo Dybala awmin, tlarhmaah Romelu Lukaku a awm bawk - ngaihthah thiang an ni ta lo.

Lukaku hian Europa League-a match a khelh hnuhnung 17-ah vawi khat chiah goal khung loh a nei a, hetih chhung hian goal 20 ngawt a khung hman. Feyenoord tan zaninah ven bik a sual lo ang.

Roma tan striker Tammy Abraham chu hliam vangin a inlan theih a la beiseiawm lo a, hetihlai hian defender inhliam Chris Smalling chuan club training a zawm ve leh tawh thung.

Feyenoord bihchianna

Dutch team langsar pawl ni ve reng ṭhin Feyenoord hian season hmasa khan league nomawi an chawi a, Europa League-ah quarterfinal an lut bawk - tun season pawh league table-ah pahnihna an ni mek a, mahse, pakhatna PSV Eindhoven aia an hniamna hi point 10 lai a ni.

Hei chauh a ni lo - Champions League-ah beisei an phak lo a, Atletico Madrid leh Lazio tluk loin group stage-ah pathumna an ni a, Europa League knockout round khel turin an tla. Mahse, hei tak hi beiseina siamtu a ni thei a, champion beisei ngamna Europa League-ah an inthlahdah lo ang.

Tlarhmaah Santiago Gimenez hi ngaihthah a thiang lo a, ani hian inelna hrang hrangah match 28 khela goal 21 khung tawhin, assist vawi nga a nei a, kum 22 mi Mexican striker hi a chet 'hot' vanglai tak a ni.

Iran tana Asian Cup khela feh chhuak Alireza Jahanbakhsh a kir leh tawh a, mual ding lam sirah Gimenez thlawp turin a awm thei ang. Hetihlai hian midfielder ṭha Quinten Timber leh centre back Gernot Trauner erawh damlohna leh hliam vangin an inlan theih a beiseiawm lo.