Manipur : FOCS-in ngaihdam dil turin Arambai Tenggol an phût

Federation of Civil Society Organisations (FOCS), Manipur chuan meitei kalfawr pawl,Arambai Tenggol ten an pawl vice president kut an thlak chu na taka an dem thu leh, ngaihdam dil ngei tura an phut thu Ningani khan an sawi.

FOCS president Th Manihar chaun Nilaini khan an vice-president Bm Yama Shah chu Arambai Tenggol-te hian kut an lo thlak tih sawiin, thu inhriatthiam loh avanga rawng taka an che zui hi an dem a, darkar 24 chhunga ngaihdam dil turin an phut tih a tarlang a ni.

Manihar chuan FOCS chuan Manipur leh a mi chengte ṭhatna turin kum 30 chhung theihtawp a lo chhuah tawh tih a sawi. Hetih lai hian Arambai Tengngol erawh pawl naupang tak, inkaihhruai leh inthununna mumal nei lo, ram venghimtu anga inchhal ve ringawt tiin, rin tlak an ni lo, a ti. Manipur mipuite chuan Meitei leh a leilung fate ṭhendarh tir tumin, Arambai Tenggol hi a phenah tuten emaw thlawpin an fuih tih an hriat a ngai tih a sawi.

Arambai Tenggol pawl chet dan chu in 'show' na ringawt, Salai Tarek (7 colours) flag awmzia leh nihna tak tak pawh hrethiam lo an ni tiin, Manihar chuan mipuite chuan he pawl hi an inlantir dan ang ngawta inbumtir lo turin a chah.