Arsenal 'Nuih' zanah Man United an 'Ngui'

Premier League club lian leh hlawhtling pahnihten Inrinni zan khan boruak inang lo an tawng. Arsenal an hlim em em laiin, an inkhelh zawh hnua inlan Manchester United erawh an result avangin an ngui thung.

Mikel Arteta nauten inkhel hmuhnawm chhawp chhuak chungin Wolverhampton Wanderers 2-1 in an hneh a, league match 14 aṭanga point 33 hmuin EPL hmahruaitu an ni chhunzawm, an hnuaia miten an khelh hmabakah hnehna chang mah se an umphak thei rih lo.

Man United erawh Newcastle United lakah team nem zawk an ni a, chak phu zawk Magpies lamin Anthony Gordon-a goal khat hmangin Erik ten Hag-a naute 1-0 in an hneh a, club pahnih intawn hnuhnung pathumah United an tlawm vek.

Laipui a puak

Kar laihawlah Champions League khelin an mikhual Lens 6-0 in an sawp thei a, anmahni khelmual Emirates Stadium-ah bawk an inkhelh leh avangin Arsenal kha chak zawk tura rinkai an ni a, goal khung tur pawhin hun an mamawh rei lo.

Defender Takehiro Tomiyasu-a ball pek dawngtu Bukayo Saka-a'n box chhungah la lutin, lo dang per deuh mah se English forward hian laklawh nei miah loin a pet lut a, goal luh hun hi minute rukna lek a nih avangin Wolves an chi ai.

Gunners an phur a, an goal nawr a na chhunzawm bawk. Gabriel Jesus leh Oleksandr Zinchenko ten mawi taka ball an inpek hnuah, box chhunga awm Martin Odegaard tan Zinchenko-a'n a pe lut a, ani hian chiang zetin a lo khung.

Gabriel Martinelli-a'n an goal thumna a khung dawn niin lang mah se goal ban a pet per a, chhawr kual theih Leandro Trossard leh Jesus ten an hun ṭha an bawhpelh bawk. Hun tawp dawna Matheus Cunha goal vangin Gunners an hlauthawng.

Gary O'Neil-a nauten hun tawp dawnah na takin an nawr a, coach Arteta pawh a hlauthawng - hun pek belhah player a siksawi nual. Striker Eddie Nketiah khan a hun ṭha lutuk kha hlah lo ni se la chuan hlauthawng lutuk loin an awm theiin a rinawm.

Arteta thukhawchang

Hnehna changtu Arsenal manager Mikel Arteta chuan, "Ka naute fak mai loh chu sawi tur dang ka nei hran lo. An khel ṭha em em a, hun tawp dawn lama goal khat kan chhuah tih mai loh kha chu sawisel tur awm lo khawpin an khel," a ti.

Tlarhnung lama Zinchenko khelh dan sawiseltu an tam a, goal nawr kawngah thawhhlawk viau mah se a awmna lam a pawp leh zauh ṭhin a, goal an chhuah chhan pawh a ni - amah pui turin Martinelli a tlan let tam hle bawk.

Arteta chuan, "Ṭhatna lai leh ṭhat tawk lohna lai a nei, hei chu player dang pawhin an nei vek. Tihsual palh hi chu thil thleng thei a ni a, midang chunga thleng thei a ni bawk, hun harsa tawh lai tak hi inthlawp hun a ni," a ti.

Arsenal hian season hmasa khan hun rei tak chhung hma an hruai a, mahse a tawpah pahnihna an ni. Kuminah hian fiahna an hmachhawn leh mek, an match dawt leh atan Thawhlehni zanlai hian Luton Town an lenchilh ang.

Man United an chak lo!

An boruak a fuh dawn chauh emaw tih laiin Manchester United an tlawm leh a, tun season atan chuan Erik ten Hag-a enkawl United hian Premier League nomawi an chuh phak dawn lo niin a lang, insiamṭhatna hun erawh a la awm.

Hmanni lawk khan Old Trafford-ah Newcastle United hi 3-0 in an chak a, inelna kha Carabao Cup a ni. Tuna mi erawh EPL a ni a, coach Eddie Howe nauten kawng tinrenga inkhel thunun chunga hnehna an chang khan Man United tan inenfiah a ngai hle tih a pholang.

Defender ṭha Kieran Trippier-a siamsak chu tunlaia khel ṭha tak Anthony Gordon-a'n minute 55-naah a khung, an vanneih ṭum ni se goal dang an khung belhin a rinawm.

Alexander Isak-a shot ṭha tak chu Harry Maguire chuan lo dang pialin goal hrulah chiah a kal chhuak a, defender Aaron Wan-Bissaka pawhin goal line bul aṭanga pet chhuah a neih bakah Fabian Schar leh Sergio Reguilon te pawh an hlauhawm hle.

Man United coach Ten Hag chuan, "Newcastle khan chak phuin an khel ṭha zawk, chu chu kan pawm a ngai. Kan tan chawlhkar hautak a ni chhunzawm dawn a, kawng dik zawh ngei pawh kan tum ang.

"Hmanni deuh khan Manchester City kan hneh lo a, chumi hnuah ṭha takin league kan khel chhunzawm, a ṭha lama kir leh kan tum tur a ni," a ti. United hian Nilaini zanah Chelsea an mikhual zui dawn, hna a hautak dawn hle.

Manchester United an hneh avangin Newcastle an hlim a, hetih lai hian an goalkeeper Nick Pope inhliam erawhin ngaihtuah a tithui ve ang. Pope-a hi hliam vangin hun tawp dawnah thlak a ngai a, a dinhmun tak hriat la ni lo mah se zai a ngai dawn niin an sawi.

Magpies manager Eddie Howe chuan, "Nick hi hun rei tak chhung a chawlh a ngai a nih chuan kan tan channa lian tak a ni ang. Ball dang tura a zuan dan ang kha ni dangah pawh a tih fo tawh a ni a, ni danga hliam an tawrh lohnaah hian vanduai chang a awm ṭhin," a ti.

Newcastle hian Ningani zanlaiah Everton an tlawh dawn a, kar tawpah Tottenham nen Premier League match hautak an khelh zui dawn bakah Champions League an hmabak bawk - player siksawi thiam a ngai dawn hle.