MVA Cup 2023 : TNT bawk an thiam ber

Mizoram Vollyeball Association (MVA) buatsaih MVA Cup 2023 chu December 1, Zirtawpni zan khan a hmawr bawk niin, nomawi inchuhna inkhelah Thutak Nunpuitu Team (TNT), Muanna Veng an chungnung.

Aizawl West Joint YMA Hall-a final hmuhnawmah TNT hian an khingpui Tuichangral chu 3-0 (25-22, 27-25, 25-18) in an hneh. TNT hi tualchhung volleyball inelna lian Pro Volleyball League champion lai kha an ni.

PVL champion an nih ṭuma an player pawimawh Vanlalṭanchhana (Valbuanga) hoin an la khel thei a, final kalkawngah hian team ṭha Chhinga Veng Spikers pawh 3-0 (25-19, 25-15, 25-16) in an hneh bawk a, anmahni elphak an awm lo.

Kawnpui tlangval Valbuanga ho hian season hmasa khan TNT hian MVA Cup hi an lo khel tawh. Khawzawla inelna an neih ṭum kha niin semifinal-ah Hunthar an ngam lo, kuminah erawh harsatna lian tham tawk loin an champion.

Hmeichhe inelna lamah pawh Pro Volleyball League champion lai Luangmual bawk an chungnung a, nomawi inchuhna inkhelah Diakkawn, Kolasib chu 3-0 (25-22, 25-16, 25-16) a hnehin an champion ve bawk a ni.