Israel-Hamas war : Indona hian a la daih rei dawn : IDF

Israel leh Hamas-ten indona chawlh lailawk tura inremna an siam a zawh hnuah, Israel sipaite chuan Gaza Strip-a Hamas firfiakte hmun chu ngawrh takin an bei chhunzawm leh mek.

Israel Defence Force (IDF) thupuangtu chuan Hamas nena an indo mekna chu hun tiam chin sawi theih a nih loh thu leh, a daih rei viau a rinawm thu a sawi. Inremna a tawp hnua Israel sipaite beihpui thlaknaah hian Palestinian mi 200 vel an thi tawh nia sawi a ni. Israel sipaite hian Gaza Strip chhim lam an thlurbing a ni.

Gaza Strip bakah Lebanon lamah pawh Israel sipaite leh Hezbollah firfiakte an inbei bawk. Israel sipaite chuan boruak leh khawmual aṭangin Lebanon-a Hezabollah hmunte chu an bei tih an sawi a, hei hi Hezbollah lamin ramri bula Israel outpost-te rocket hmang an beih an chhanletna a nih thu an sawi.

Israel prime minister Benjamin Netanyahu chuan an sipaite chu nasa zawka an inbuatsaih thu sawiin, "Kan thil tum ber kan puitlin hma chuan hma kan la chhunzawm zel dawn. Hengte hi khawmuala beihpui thlakna tel lo chuan a hlawhtling thei lo bawk a ni," tiin nimina TV-a ram mipuite hnena thuchah a sawiah a sawi lang.

Indo tawp hma chu tang inthleng a awm tawh lo ang : Hamas

Israel-Hamas-te inremna a tawp hnuah, Hamas lam pawhin rocket hmangin Israel an kap chhunzawm reng a, Israel nena indo tihtawp a nih loh chuan an mi tang kawlte inchhuahsak tawn a ni tawh lo ang tiin an sawi.

Ni sarih indo an chawlh lailawk chhungin Hamas leh Israel hian an mi tangte eng emaw zat an inchhuah sak tawn a ni. Ram hrang hrangte hruaituten inremna hi siam chhunzawm leh turin an nawr reng a, hetih lai hian Hamas lam chuan inremna siam thar leh tura inbiakna an la neih leh loh thu an sawi. France president Emmanuel Macron chuan Israel leh Hamas-te hi inremna siam leh tura nawr turin Qatar pan a tum.

US secretary of state Antony Blinken chuan Israel-in a ram venghim tura dikna a neih chu an hriatthiampui thu a sawi rualin, Gaza-a beihpui an thlak chhunzawm lehnaah civil mite himna tur leh an tawrhna thlen tlem thei ber tura hma la turin a chah.

October 7-a Hamas-ten Israel an beih hnua Israel leh Hamas inkara indona thleng vang hian Gaza Strip-a Palestinian thi zat hi mi 15,000 an tling tawh a ni.