Kawng chhia avangin Zunheboto-a khaw 17 te an nuar

Nagaland-a Zunheboto district-a Pughoboto, Sataka leh Atoizu constituency huam chhunga khaw 17 te chuan an khaw huam chhunga kawng chhe lutuk avangin nawrh an huaihawt.

Showuba-Pangsha (East-West Corridor road) hnuaia section-3 khuaa awmte chuan public forum dinin, EAC headquarters, Saptiqa-ah Inrinni khan nawrh hi an huaihawt hi a ni. Forum chuan rorelna dik leh rualkhai nei tura sorkar an beiseinaah an kawng chhe lutuk hi thutiam hlawhtlin lohna leh, an area ngaihthah an nihna lantirna a nih thu sawiin, deputy chief minister, TR Zeliang hnenah memorandum an theh lut. TR Zeliang hi National Highways and Planning Transformation minister incharge a ni bawk.

Forum convener, Vitoho Zhimo chuan Showuba aṭanga Pangsha thlenga kal, Indo Myanmar ramri pawh tur, East-West corridor, two lane kawngpui chu Mukalimi khua tan tlang tur a nih thu leh, khaw 17 te pal tlang vek tur a nih thu sawiin, kawngpui siam hna thawktu, National Highways & Infrastructure Development Corporation Limited (NHIDCL) chuan mipui tam zawk awmna leh ṭangkaipui theihna tur zawk lamah kawng chu siam an rawt tih a tarlang. Mahse NHIDCL chuan an rawtna siam tawh anga kalpui leh si loin, khaw pakhat; Chishilimi khua chauh ngaihtuahin, Khukiye-Lukhai leh Satakha khua te bypass-in, NH 702A kal thuahin kawngpui chu an siam a ni tiin Zhimo chuan a sawi bawk. NHIDCL chuan mihring 20,000 chuang awmna ngaihthahin, mihring 1,000 awrh chauh awmna an ngaipawimawh lui a, kawng siam tura rawtna awm vek tawh pawh survey dik lo hmanga thlak an ni tiin Forum chuan complaint an theh lut bawk a ni.