Nagaland-in kumin chhungin an state aṭanga tangseh (Measles-Rubella) tihbo hman tum

Nagaland health and family welfare department chuan kumin kum tawpah an state aṭanga Measles-Rubella (MR- 'Tangseh') tihbo hman an tum thu puangin, state immunization officer Dr. Imkongtemsu Longchar chuan,"Kan tum ber chu MR tihbo leh inkai chhawn a awm lohna tur atana MR vaccine 95% sem chhuah hman a ni," a ti.

State health thupuangtute chuan mi rethei, MR vaccine la thei lote pek chu an ngaih pawimawh ber tur thu sawiin, April-May chhung leh August-September chhunga MR tihbona tur hmalakna an kalpui thu an puang. Mi nawlpui tana vaccine sem chhuah chu November 20-30 chhunga neih tum a nih thu an sawi bawk.

MR vaccine hi naupang tan MR1 leh MR2 anga pek a ni a, hei hi thla kuana leh thla 16-na aṭanga thla 24-na inkarah dose 2-a pek ṭhin a ni a, vaccine-in ṭha taka hna a thawh theih nan dose lak kim hi a pawimawh tih an sawi. Naupang MR1 leh MR2 la lote hian kum 5 an tlin hma chu an la thei reng tho a ni. State data-a tarlan a nih danin, MR1 dose hi 96%-in an la a, MR2 dose 92%-in an lak thu an sawi a, hei hi sorkar chuan state puma 95% a kai theih nan hma an la dawn a ni.