Warriors hnehtu Nuggets

Nimin zing NBA regular season inkhel hmuhnawmah Denver Nuggets an chak. Nikola Jokic-a point 35 neih hmangin Nuggets hian an khingpui Golden State Warriors chu 108-105 in an hneh.

Team pahnih an inkhel tawk takzet a, quarter thumna an khelh zawhin Warriors an la chungnung hret. A chak tur chinfel nan quarter hnuhnung ber an khel zui - Nuggets lamin point 32 an neih belh laiin GSW erawhin point 27 an nei, a tawpah Jokic awmna hi an sang ta hret.

NBA champion lai chak puitu Jokic chuan, "Champion kan nih avangin pressure kan nei hran lo a, match zawng zawng mai hi nuamti takin kan khel tawp mai a ni," a ti. Jokic hian point 35 a neih bakah rebound vawi 13 lain assist vawi nga a nei bawk.

Jokic bakah hian Denver tan Reggie Jackson (20 point) leh Michael Porter (17) te an che ṭha bawk a, kum 2022 NBA champion Warriors tan Stephen Curry-a point 23 neih chu chak pui tham a ni lo, player dang zingah point 20 nei tling an awm lo a ni.

Western Conference lamah Nuggets hian hma an hruai zel - match riat an khelh tawhah vawi sarih an chak thei a, ṭum khat chiah chetsual an la nei. Warriors erawh vawi thum an tlawm ta a, table-ah palina dinhmun an luah mek.

Inkhel dangah Milwaukee Bucks chuan point 10-a an hnufual hnuah Detroit Pistons 120-118 in an hneh. Point 15 neitu Giannis Antetokounmpo chu hnawhchhuah a ni a, an lak thar Damian Lillard chuan point 34 neiin a thawhhlawk hle bawk a ni.

Joel Embiid-a point 27 hmangin Philadelphia 76ers chuan Boston Celtics 106-103 in an hneh a, tun hnaiah a zawnin vawi ruk an chak ta. Eastern Conference hmahruaitu tan hian Tyrese Maxey chuan point 25 a nei bawk.

Hliamin a tihbuai Los Angeles Lakers an la che fuh thei lo, an khingpui Houston Rockets lakah 128-94 in an tlawm.