Vanglaini - Sikkim-ah Children film festival

KHAWTHLIR

Disaster training

Disaster Management & Rehabilitation (DMR) department chuan nimin khan Hunthar Veng Branch MHIP Hall-ah ni thum awh tur 'Capacity building programme of Hunthar locality training' an buatsaih a, DMR secretary Lalthangpuia Sailo-in a hawng. Lalthangpuia Sailo chuan Hunthar mipuite chu hun harsa leh dinhmun hlauhawma an awmlai pawha chi ai mai loa tanpui ngaite inṭanpui tawn turin a chah. Training-ah hian Aizawl District Disaster Management Authority CEO John LT Sanga leh DMR assistant director Dr Lalrokima Chenkual ten thil pawimawhte an sawi a; ADDMA bakah, PWD hotu te, Hunthar Veng Local Council member te, MHIP, YMA leh pawl dang aiawhte an tel a ni.

Thisen pe

Mizorama Indian Reserved (IR) police 5th battalion, Lungverh chuan Mizoram Police din champha pualin nimin khan blood donation camp an huaihawt a, Aizawl Civil Hospital tan thisen unit 39 an pe a, a petute mipa 38 leh hmeichhia pakhat an ni.

Rintlakah ngai

Tlangpui Village Council chuan thuchhuah siamin, Tlangpui YMA library sak chungchangah Tlangpui YMA hruaitu ṭhenkhatin party politics an lâk nat avangin an khawtlang an timualpho niin an tarlang a, "Hetianga hma an la hi ṭha kan ti lo. Department ngei pawhin he hna hi pawm tlak leh rintlakah ngaiin, bill pawh lak vek a ni. VC-te pawhin he hna thawh hi rintlak leh ṭha tâwkah kan ngai. YMA-te kan khaw ti mualpho zawnga an chet ang hi tun hnuah chuan thleng tawh lo se," an ti.

Serchhip DC-in hna zawm

Serchhip DC atana ruat thar Dr Lalzirmawia Chhangte, IAS chuan nimin khan a hna thar a chelh ṭan. Dr Lalzirmawia hian DC mawhphurhna lo chelh lailawktu addl. DC Chuauhnuna hnen aṭangin charge a la a ni. Serchhip DC hian DC pisa-a thawktute leh official dangte nena inhmelhriatna hun a buatsaih nghal a ni. Dr Lalzirmawia hi MCS aṭangin nikum khan IAS-ah a kaisang a ni.

DAWNTISEI

Sikkim-ah Children film festival

Children’s Film Society, India (CFSI) chuan February thla hian Sikkim-a South District-ah children film festival a buatsaih dawn.

Festival buatsaih tur chungchang ngaihtuah hian DC (South) Ragul K, ADC (South) Satyan Kumar Pradhan, SDM (HQ) Chiran Rizal leh Assistant Distribution Officer of CFSI Pramod Alphanso te chuan meeting an nei a ni. DC chuan festival-ah hian sorkar leh private school te pawh an tel dawn niin a sawi. Jawaharlal Nehru Institute for the Visually Handicapped, Boomtar tan special show buatsaih a ni bawk ang.

Children’s Film Society hi Union Ministry of Information and Broadcasting hnuaia awm niin, naupang pual film siam, chhuah leh thehdarhte an buaipui a ni. CFSI hian library 265 a nei a, an film siam ṭhenkhatte chuan national leh international award te pawh an lo la tawh a ni. Kumtinin ramchhung hmun hrang hrangah Children Film Festival hi a buatsaih ṭhin a ni.

Share this Post

Login to comment

No Comments