Iran thlawp Yemen hel pawlin US drone kap thla

Yemen rama Houthi helpawl chuan US military drone an kap thla tih US official leh Houthi movement chuan an sawi. Houthi helte hi Iran sorkarin a thlawp a ni.

US official chuan Yemen tuipui kamah MQ9 drone kah thlak a nih thu a sawi a, Houthi pawl thupuangtu pawhin an pawl kah thlak a nih thu an nemnghet ve bawk.

Israel-Hamas indona thleng mekah, US chuan Middle East-a Iran thlawp helpawlte he indonaah hian lo inrawlh ve lo turin a lo vau lawk tawk a ni. October thla khan US chuan Houthi pawlin Yemen aṭanga Israel beihna tura cruise missile leh drone an kah chhuah eng emaw zat chu a lo kah thlaksak tawh a ni. Hei bakah Middle East-ah aircraft carrier leh a puitu tur lawng lian dangte pawh a tir tawh bawk a ni.

Iran in a thlawp bawk, Lebanon-a Hezbollah helpawl pawhin Israel hi an lo bei tel ve bawk a, Hezbollah hotu chuan Israel-in Gaza bei a, civil mite thihna a thlen chhunzawm zel chuan Middle East-a indona lian zawk a thlen theih tur thu a sawi.

Republican presidential candidate-te inlungrual

Israel leh Hamas-te indona thleng mekah, US chuan Israel a thlawpna a tilang zel a, Arab ramte sawisel pawh a tawh phah hle.

Nakkuma US President thlanna neih tura Republican party presidential candidate chuh tumte pawhin indona a thlen hnua debate an neih hmasak berah, an vaiin Israel an thlawp thu an sawi. Hetih lai hian China leh Ukraine chungchangah erawh chuan an ṭanhmun a inang vek lo thung.

Nilaini zana debate an neih hi Republican presidential primary debate vawi thumna niin Chris Christie, Nikki Haley, Ron DeSantis, Vivek Ramaswamy leh Tim Scott-te an inlan. Candidate-te hian an vaiin, Hamas-te'n October 7-a Israel bei a, mi 1,400 chuang an thah hnuah Israel-in Gaza Strip-a beihpui a thlak chu an thlawp thu an sawi vek a ni. Israel-in a ram venhimna tura a hmalakna an thlawp thu an sawi rualin, Gaza Strip-a chhawmdawlna kalpui dan tur chungchang erawh sawi lan an nei lo.