Káwl A Êng Dawn Nge?

Zan khaw thim hi hrehawm leh harsatna, manganna sawi nan te kan hmang ṭhin, chutih laiin káwl éng chu hlimna, lawmna lo inṭan tur sawi nante kan hmang bawk ṭhin. Tam tak chuan kan sawrkar hrawn tawhte engkimah sawiselna em em kan nei lo mai thei, ṭhenkhat erawh chuan ram hmangaihtu tak tak kan va mamawh em an ti vawng vawng ve thung bawk a. A ni tak a, kan ram chu ram hmangaihtu tak tak intiten min lo hruai ṭhin tawh a, mahse, a ngaihna an hre lo nge, an hmangaih tak tak lo, vawiin thlengin state rethei tak mai kan la ni reng a ni. Mipuite kan phun nuai nuai a, a sawt tawh ṭhin si lo mahse, hei kan inthlang leh ta a, tun ṭumah chuan roreltu duh ang kan thlang chhuak tawh ang em aw? Nge ni, mipuite pawh hian inthlannaah chuan kan lungawi lohnate kan theihnghilh ve leh mai ṭhin zawk. Kan vote-te, contract hna, sum leh thil dangtea kan hralh leh mai si chuan nakinah kan chan a la chau tawlh tawlh dawn a ni.

Hriin Min Nuai – Khawvel ram dangte ang bawkin Mizoram pawh covid hriin min nuai, tam takin an hna an chán a, sumdawngten sum tam tak an hloh bawk a. Hrisel lohna chi hrang hrangten min man belh bawk a, nunna chán pawh sáng dawn lai kan awm a ni. Ni tin inhlawhfaa eizawngten kut an dawh a lo ngai a,thil zuar ṭhinten an zuar thei tawh bawk si lo. Motor khalha eizawngte pawn an hna an thawk thei lo va, private office ang chia thawk reng rengte pawn an hna an chàn a ngai. Hmun tin maiah hri kai enkawl an ngai, pawisa lo ngai zel si, sawrkar pawn a tih hleih theih loh hun a lo awm ta a. Kan sawrkar auhla ber chu hri vangin engmah a tih theih loh, sum leh pai kan harsa, tih chu a ni ta ber mai.State rethei nihsa naka laiin kum hnih ngawt mai chu engmah thawk thei lovin min phuar chu a lo ni reng mai. Ram dang ang bawkin kan economy chuan a tuar ve hle turah ngai ila.Ngai awh chho leh tur chuan kan beih fat fat a ngai ngei ang.

I Ṭawngṭai Ang – Ram hruaitu ṭha leh ṭha lo inkar hlat zia chu kan hre ṭheuhin ka ring. Manik Sarkar (Tripura CM) ni ṭhin chanchin kan hre ṭheuhin ka ring, chutiang bawkin Nitish Kumar, Bihar CM te pawh sawi ta zel ila, kan hmaih hauh loh tur chu Delhi CM, Arvind Kejriwal-te pawh. Ram pawn han sawi thleng ta ila, Ukraine ram hruaitu, Volodymyr Zelenskyy te pawh, ani hi awm lo se emaw, ram hmangaihtu tak tak ni lo se chuan vawiinah Ukraine ram chu sawi tur a awm tawh lo vang.

Miin ram a hmangaih tak tak a, a nunna hial pawh a phal chinah hi chuan, a tawi zawngin sawi ta ila, Pathian pawh hian a hmuh hmaih duh lo reng reng, a hre reng zawk ṭhin a ni. Aw le, keini pawh kan inthlang, ram hmangaihtu eng emaw zat an rawn in-candidate a ni, an hmangaih tak tak leh tak tak loh chu rei lo teah a lang leh mai dawn a ni. Engpawhnise, tuna kan tih theih tawk awmchhun chu Pathian hnena ṭawngṭaia ram hruaitu ṭha dil a ni deuh ber mai.

Sawrkar Thar – Vote kan thlak zo tawh a, rei lo teah sawrkar thar kan nei dawn. Party ngai nge, mi dang, tute nge ni dawn? tih chu kan inrinsiak laih laih hun lai a ni e. Tu party pawh lo sawrkar se, thawhpui thei turin I inbuatsaih ang.Eng ang sawrkar nge ni ang aw, kan ram chu min intodelhpui tawh dawn nge, ram hmangaihtu tak tak an nih chuan kan vannei hle dawn a ni. Sawrkar hi ṭha tak a awm thei a, ṭha ve mai mai a awm thei bawk a, ṭha lutuk a awm hlauh thei bawk a ni. Sawrkar ṭha lutuk hi chu a awm ngai mang lovin ka hria, kalphung pangngaia kal, ṭha em em lo, chhe em em chuang lo hi an ni duh tlangpui khawp mai. Party ngai pawh lo chak leh ta se, kalphung danglam deuh, thil thar la rawn ti chhuak turtein han beisei ila. Thil hi a eng zawnga thlir a ṭha an ti a, keini Zoram mipuite paw'n sawrkar thar ṭha tak mai nei turin inbeisei ila, a lo nih loh tak leh kan tlákna a sang deuh tal ang chu.

Kan ram chu ram hmangaihtu tak tak intiten kum tam tak min hruai tawh a, mahse, vawiin thlengin eng he hu kan la ni thei lo. Tun sawrkar thar turah hian eng nge kan an ang aw? Hetih lai hian mipuite pawh hian thil hi kan chik lutuk bik lo, kan ngaihtuah thui vak lo ṭhin. Kan lungawina hi a ho leh riau ṭhin, a tawpah an eiru zo vek, kan ti leh ringawt zel mai. Aw le, engpawhnise, mipuite chuan hruaitu ṭha an mamawh, kawng dika hruai a, intodelh turin. Zoram mipuiten I thlir dek dek teh ang – Kawl A Eng Dawn Nge? Beisei tak chungin.

- Lalchhandama Colney

Ph-9862982321