Tripura-a anti-CAA rally-ah tel ṭhahnem Citizen ni mah se ramdang mi Tripura-a awm phal dawn lo

West Tripura-a Khum­lung-ah kar liam ta Inrinni khan Tripura lal thlah leh Congress hruaitu hlui, Pradyot Kishore Manikya Debbarma kaih­hruaia Citizenship (Amendment) Act (CAA) duh lohna lantirna kawng­zawh huai­hawtah mipui tel an ṭhahnem hle. 

Khumlung-a rally hi Tripura-a CAA dodalna lantir tawha mipui an tel tamna ber nia sawi a ni. 

Ramchhunga hmun hrang hrangah sawiselna leh dodalna tam tak a awm mek chungin, central-al BJP kaihhruai NDA sorkar chuan kar liam ta Zirtawpni aṭang khan CAA hi hman ṭan a ni tih sawiin, hriattirna a tichhuak a ni. 

Tripura Congress president hlui Pradyot hi CAA dodal nasa ber­tu zinga mi niin, he dan siam thar duh lohna lantira hma­la tur hian tunhnaia non-poli­tical organisation, Indigenous Progressive Regional Alliance (TIPRA) pawh a lo din tawh a, Supreme Court-ah CAA khinna peti­­tion pawh a thehluh bawk.

Pradyot chuan CAA chuan ram leilung fate dinhmun hlauh­thawnawm takah a dah dawn a ni tiin, "Tripura-ah chuan ram leilung fate dinhmun hi a derthawng tawh a, CAA hian harsatna a siam belh sak dawn bawk a ni," a ti. Hemi rual hian mipuite chu CAA an dodalna a lantirna kawngah pawh boruak muanawm tak hnuaia ti turin a ngen. 

CAA hnuaiah ramdang aṭanga lut, mi eng emaw zat chuan India khua leh tui nihna pek an ni ngei dawn a, mahse citizenship hi nei mah se heng mite hi Tripura-a an inbengbel chu an phal dawn lo tih Pradyot chuan a sawi. 

Prime minister Na­rendra Modi hnenah, Citi­zenship (Amendment) Act hman a nih hnuah ramdang mi rawn lut, India khua leh tui pekte chu Tripura leh hmarchhak state dang­ahte dah loin, Gujarat leh state dangah dah zawk turin a ti bawk. 



Share this Post

Login to comment
No Comments