SC/ST Act hnuaiah Tripura journalist man

Special Public Prosecutor Samrat Kar Bhowmik chuan, self-styled journalist, jail pawh tang tawh; Saikat Talapatra chu The Scheduled Castes and Scheduled Tribes (Prevention of Atrocities) Act hnuaia a laka thubuai thar a awm avangin police-te hnenah hlan a nih thu a sawi. Talapatra hian online-a chanchinthar a theh darhna, 'News Independent' kaltlanga thu pawi leh thu tling lo thil a theh darh avangin man a lo tawk tawh a ni.

Thubuai theh luttu hi TIPRA Motha founder, Pradyot Kishore Debbarman niin, hnam pakhat tana huat theih tur zawnga thu a chhuah avanga thubuai theh lut a ni. Pradyot chuan,"Video a siamte kan zir chian hnuah chanchinthar buatsaihna lam aiin a video siam kaltlanga hnam bil pakhat a beihna leh hmuhsitna hi chiang takin a tarlang a, hei hi Tripura-a tribal leh tribal ni lote lungrual taka kan khawsakhona tichhe thei leh tibuai thei thil a nih avangin hma ka la ta a ni," tiin a sawi. Prosecutor Bhowmik pawhin Talapatra chuan thubuai panga a neih mek thu sawiin,"A laka thubuai theh luh thar ber hi SC/ST Act hnuaia ziah luh a ni a, IPC section dang pawh awm tho mah se hei hi a langsar leh thubuai theh luh chhan ber chu a ni," a ti ve bawk.

Talapatra hi ni ruk chhung police kuta awmin, November 2-ah hian court hmaah a inlan ang. October 6 khan Bengal-ah man niin Agartala-ah hruai haw a ni a, man a nih hma lawk hian thu a chhuah ṭhenkhatah Tripura chief minister, Dr. Manik Saha chungchang chhuahin, eirukna leh thil dik lo hrang hrangah CM hming hi a sawi tel a ni. Police-te hian Talapatra bank account hi hrensak bawkin, sum faia pui ṭhintute zawn an tum bawk a ni.