Meghalaya-in compulsory subject atan Maths neih rel
Meghalaya Board of School Education chuan sikul subject zirlaia compulsory subject atana Maths dah an rel. Education Minister, Rakkam Sangma chuan meeting koin, Shillong-a secondary leh higher secondary sikul hrang hrang aṭangin principal 40-te he meeting-ah hian an tel.
Meeting-ah hian textbook thlak leh syllabus tihdanglam bakah Mathematics chu compulsory subject atana neih leh an rel a, principal-te hian ram pum huapa zirna mila textbook thlakte an rawt a ni. Textbook chungchangah chuan zirtirtute hian zirlaibu kalphung leh a chhung thute hi a thuiin a chuangtlai an ti a, thiam pawh an tlem phah niin an sawi a, sikul ṭhenkhatah chuan Meghalaya Board of School Education siam ni lo textbook hmang pawh an awm. Textbook Revision Committee te hi October 31-ah an inhmu khawm dawn a, meeting-a rawtnate hi an thlir zui leh ang. Committee hian Directorate of Educational Research and Training (DERT)-in thla 7 chhung zir chianna an lo neih tawhte pawh an ngaihtuah dawn a, DERT hian mithiam leh mi hrang hrangte ngaihdan lain, textbook leh syllabus chungchang hi an lo zir tawh a ni.
Education Minister chuan "Zirtirtu tam takte chuan compulsory subject atana Mathematics dah leh hi an duh a, mahse, sorkar chuan hei hi ngaihtuah ṭhat leh rih a la duh a ni. Tunah chuan principal-te rawtna ngaihtuah leh zir chianna neih phawt ṭha kan ti a ni," tiin a sawi. "Tunah hian Meghalaya Board of School Education chuan subject paruk aṭanga tihṭhatna pangaa mark-te lain chu chu exam pass nan hman hi a la kalpui a ni. Hei vang hian zirlai tam takin Maths an thlang duh lo ṭhin. DERT hnenah pawh zir chianna nei tura ngen ni tawhin, hetianga zirna kalpui a nih hma leh hnua Maths-a zirlaite tihṭhat dan hria a, eng zat nge fail ṭhin tihte hriat phawt kan tum a ni. Mi zawng zawngin subject zir nuam leh awlsam kan duh a, Maths hi optional-a kan dah chuan zirlai tam takin an thlang dawn lo tih hi a chiang. Tun generation angah hi chuan Maths tel lo a higher zir hi thil har a ni," tiin a sawi bawk.