Manipur: Zirlai 15,641 te sikulah admit an ni leh tawh

Manipur education minister, Th. Basanta Kumar Singh chuan May 3, 2023-a tualchhung buaina chhuak avanga zirlai raltlan leh an chenna tlanchhiatsante tan sorkarin hma a lak mek thu sawiin, sikul leh college hrang hranga an zir chhunzawmna tur an ngaihtuah thu a sawi.

Basanta hian thuthar lakhawmtute kawmin, education department chuan heng zirlaite tan hian zir dan phung chi dang a ngaihtuah bakah relief camp-a awmte tan zirna pek chhunzawm an nih theih dan tur an ngaihtuah thu a sawi a, Ministry of Education, Government of India hnenah hnenah zirna hmun ṭha an neih theihna tur atan rawtna an thlen thu a sawi bawk. "Sorkar hian zirlai tlanchhiate tan zirna ina admission pek an nih theih nan leh zirna an chhunzawm theihna atan harsatna awm zawng zawng sut kian a nih theih nan a bei a ni. Manipur-a sikul 4,617 awm zinga 26 chu relief camp atana hman te, police awmna atan leh hmun ralṭi zual laia awm te an ni a, hawn leh theih thuai kan tum a ni. Heng zinga 18 hi Churachandpur-a awm niin, Imphal East-ah pathum, Jiribam-ah pathum leh Chandel leh Kangpokpi-ah te pakhat ve ve an awm bawk. Imphal West-ah chuan sikul zawng zawng hawn leh tawh a ni thung," a ti.

Sorkar chuan nodal officer-te nena thawk hoin control room a siam a, zirlai uniform nei lo leh zirlaibu nei lote an buaipui zung zung ṭhin tiin, relief camp 347-a zirlai raltlan leh tlanchhiate zinga 15,915 te hnenah identity card pek tawh an ni a, heng zinga 15,641 te chu zirna chhunzawmin sikul leh college-ah te admit an nih leh tawh thu Basanta chuan a sawi bawk. "Zirlaite hi admission a thlawna tihsak vek an ni a, zirna tur hmun pawh ngaihtuahsak an ni. Harsatna an tawh avanga an zirnain a tawrh hi kan remti dawn lo," tiin a sawi.

Education minister hian heng zirlaite tana CM College students Rehabilitation scheme 2023 kalpui a nih thu te, hmun hla deuha awmte tan an zirna pui tura smartphone sem a nih thu te, zirlaite nunphung ngaia an nun leh theih dan tur ngaihtuah tur 'Committee for guiding on the path of development in Education' din a nih thu te sawi bawkin,a thlawna en theih, Jio TV kaltlanga educational channel, 'Lairk' siam a nih tawh thu leh zirna kalpui theih dan hrang hrang kawng an dap reng thu a sawi bawk. LAIRIK hi mobile application anga siam a ni bawk a, zirna kaihhnawih video 1,3000 chuang en tur a awm a ni.