J&K sawptu Mizoram an tla

Pathianni tlai khan SEC Railway Stadium, Nagpur-ah Mizoramin point la hmu lo Jammu & Kashmir chu 4-1 in sawp mah se champion lai Services-in hun tawp dawnah Maharashtra lamah chakna goal an khung avangin Santosh Trophy vawi 70-naah beisei tur an nei tawh lo.

Mizoram hian Thawhlehni tlai dar 3:30 hian group match hnuhnung berah Services an hmachhawn dawn a, an chak a nih pawhin semifinal an lut thei tawh lo. Group A aṭangin inelna thlengtu Maharashtra leh Services te'n knockout stage an lut a, Mizoram ang bawkin Railways leh J&K-te an tla thung.

Mizoram tak tak

Railways an draw hnuah Mizoramin inlena thlengtu Maharashtra an hneh lo a, match thumnaah Jammu & Kashmir lakah an theihna tak tak an pholang.

Mizoram hian inkhelh ṭan aṭanga minute thumna lekah MS Dawngliana tauh luh hmangin hma hruai mah se minute hnih hnu lekah Jammu & Kashmir-in an siphurh an sut nghal.

First half-ah J&K-in goal khungna chance ṭha dang nei lo mah se goal khungna chance nei Mizoram an chungnung bik lo. 2014 champion Mizoram tan K. Lalṭhathanga leh Dingngheta ten goal khungna ṭha an hlah a, khung ngei ngeina tur erawh a ni lo.

Hun chanve hnu lamah Mizoram an che
ṭha zui a, goal hmahruai khungtu Dawngtea'n minute 60-naah penalty hlawh chhuakin Sawmfela'n goal-ah a chantir a, minute 10 hnuah ding lam aṭanga Lalrosanga cross chu Dingngheta'n pet goalin Mizoramin 3-1 in hma an hruai.

Mizoram an vanduai chhunzawm a, goal khungtu Bethlehem Vengthlang tlangval Dingngheta'n yellow card vawi hnihna hmuin hnawhchhuah a ni. Mizoramin player 10-in minute 15 bawr vel khel mah se an nawrtu zawkah an ṭang chhunzawm a, substitute Lalmuansanga'n field chhung a luh aṭanga minute khatna lekah Mizoram goal lina an khung.

Mizoramin an match thumnaah Jammu & Kashmir 4-1 zeta sawp vangin lawm viau mah se University Stadium lama inkhel result an hre chhunzawm a, Services-in hnehna an chan avangin Mizoram team an ngui hle.

Mizoram coach HC Zarzoliana chuan, "Services leh Maharashtra an inhnehtawk niin kan hria a, amaherawhchu injury time-ah Services-in chakna goal an khung avangin beisei tur kan nei tawh lo. J&K
ṭumin theihtawp kan chhuah a, kan khel ṭhat ang ngeiin chak chiang mah ila beisei tur kan nei tawh loh avangin kan khelh hmabakah hi chuan sawi tur pawh ka hre lo. Nagpur-a Mizo awmte chungah erawh kan lawm takzet a, min ṭawiawmna hi kan beisei phak bak a ni," tiin Vanglaini palai a hrilh.

Mizo inṬawiawm tawnna

Mizoram team hi Nagpur-a Mizo awmten an ṭawiawm ṭha hle. Mizo Christian Fellowship chuan Pathianni inkhawm tlai dar 3:30-a neih ṭhin chu inkhel en turin tlai lam dar 1:30-ah an sawn a, Wardha aṭangin Mizo 22-in inkhel en turin Nagpur an pan bawk.

Nagpur leh a chhevela Mizo awmte hian Mizoram team hi inelna ṭantirh phat aṭangin an ṭawiawm ṭha nghal a, RIN RIN kutchhuak Mizoram jersey 50 zet chu inelna ṭan hmain hralh zawh nghal niin Mizoram inkhel en theih nan Chapchar Kut neih hun an sawn bawk.