Stoke-in Chelsea an chelh

Stamford Bridge-ah Mame Biram Diouf-a goal hmangin hun tawp dawnah Stoke City-in mual-neitu Chelsea an draw a, Blues chungah an la inham tang zel.

Inrinni zanah Blues-in minute 39-na leka Bertrand Traore-a goal hmangin Stoke City lakah hma hruai mah se an ṭang tluan thei lo. Minute 85-naah Manchester United forward hlui Diouf hmangin Potters-in an siphurh an sut a, Chelsea keeper Thibaut Courtois-a'n Bojan-a goal khung tur dang lehin hun tawp hamrik a rik meuh chuan Guus Hiddink-a hote an vannei zawk.

Stoke-in point 43 hmuin pasarihnaah an awm a, 10-naa awm Chelsea-in point thumin an pha lo. Blues hian Nilaini zanah Paris St-Germain nen Champions League last 16 second leg an khelh dawn avangin player ṭha ṭhenkhat an awltir a, manager lailawk Guus Hiddink chuan December thlaa tla thei dinhmuna awm tan chuan tuna a awmna chu a chhiat loh thu a sawi.

Europa League???

Chelsea-in season thara European competition khelh an tum a nih chuan Europa League hi an cho phak tawk niin lang mah se awlsam tak chuan an chang dawn lo.

Goodison Park-ah Everton-in Romelu Lukaku leh Aaron Lennon te goal hmangin West Ham lakah hma hruai mah se goal pahnih luh inkara Kevin Mirallas hnawhchhuah a nih avangin hun tawp lamah Toffees an chesual. Hammers-in hun tawp minute 12 chhungin goal thum an khung a, Michail Antonio leh Diafro Sakho ten goal khat ve ve an tauh luh hnuah Dimitri Payet-a'n injury time-ah chakna goal a khung.

Slaven Bilic hoten hian point 49 an hmu tawh a, pangana dinhmun luahin Europa League khel turin an dinhmun a ṭha chho zel. Hammers ang bawkin player 10-a khel Southampton-in injury time-a Virgil van Dijk goal hmangin Sunderland an draw a, point 41 hmuin pariatnaah an awm.

West Ham, Manchester United, Stoke City, Southampton, Liverpool leh Chelsea-te Europa League la khel thei vek an ni a, champion tur inum ang thoin Europa League khel tur inchuh hi a ngaihnawm ang.

Relegation Battle...

Pawisa hmang tam Newcastle United-in an mualah AFC Bourne-mouth 1-3 in an hneh lo a, Steve McClaren hoten point 24 chiah hmuin 19-naah an awm. Premier League-ah hian point 40 hmu hi him tura ngaih an ni a, Bournemouth-in point 35 an hmu tawh.

Swansea City-in Gylfi Sigurd-s-son goal hmangin Norwich 1-0 in an hneh a, Swans hian point 33 hmuin 16-naah awm - an la him lo. Norwich erawh point 24 an hmu a, 18-naa an awm mek avang leh an squad a chhah bik loh avangin an tlak a rinawm ta hle.

Newcastle boss Mc Claren chuan club hotuten an ban loh chuan ama thua ban a tum lo. Relegation Battle tingaihnawm tur chu Aston Villa leh Norwich lam ni loin Newcastle leh Sun-derland-te an ni ang.