Napoli-in nomawi beisei chhunzawm zel

Napoli chuan Serie A title lak an beiseina an la chhawm nung zel. Inrinni zan khan an mikhual Chievo chu 3-1 a hnehin point 61 hmuin league hmahruaitu an ni rih. Mahse nizan a Juventus result a zirin an dinhmun hi a la danglam thei thung.

Maurizio Sarri naute hian an league match hnuhnung pathum aṭangin point hnih chauh an hlawh chhuak thei a, Chievo lakah pawh hian minute hnihna lekah goal an chhuah avangin an talbauai leh dawnin a lang hman.

Stadio San Paolo-a inkhelah Chievo midfielder Nicola Rigoni chuan goal hmahruai a khung a, mahse champion tun Napoli hian Gonzalo Higuain, Vlad Chiriches leh Jose Callejon-te goal hmangin an chhang let a ni.

Napoli coach Maurizio Sarri chuan, "Minute hnihna lekah goal kan chhuah nghal avangin inkhelh a hautak tawh a, mahse hun harsa kan paltlang thei," a ti.

Sarri chuan an si phurh suttu Higuain fak zuiin, "Zanin khan a khel ṭha tak zet, Higuain hi chuan engtik lai pawn goal khung a duh a, a rilru hi a dikin theihna a nei sang hle," tiin a sawi.

Argentina international Higuan hian tun season-ah league goal 26 khung tawhin Napoli-in title an beisei theih nan a thawhhlawk fal rih hle a ni.

Inkhel dangah Sampdoria chuan season thara Serie A khelh chhunzawm an beiseina an la vawng nung ve zel a, table mawngphah a mi Verona chu 3-0 a sawpin league table-ah 13-na dinhmun an luah.