Kangmei lakah Durtlang kham ven hna ṭan

Mizoram Environment & Forest Consultative Forum (ME&FCF) chuan kum danga an tih ṭhin angin Durtlang kham ven hna an ṭan leh tawh.

Kham ven ṭan puala inkhawm tawi Inrinni zinga buatsaihah Con-servator of Forest Lal-rinmawia chuan Durtlang kham hi a hnuai lam aṭangin a kang ṭhin tih sawiin, "Bawlhlawh paih ṭhinten an bawlhlawhah kangmei tichhuak thei tur thil an paih tel ṭhin avanga kangmei chhuah phah ṭumte pawh a awm a ni," a ti.

Lalrinmawia sawi danin, Forest dept. chuan Durtlang kham hi thirlenin an hung a, hemi atan hian cheng nuai 23 vel sen ral a ni tawh. Kumin bikah mei kawng sialna atan cheng nuai 2 vel sen a nih tawh bakah, kangmei chhuak thei vengtu tur rawih belh tum a ni.

ME&FCF hian Forest dept. nen ṭangkawpin kum 2010 aṭang khan Durtlang kham hi kangmei laka a him theihna atan an veng ṭan a ni.