Union home minister Amit Shah chuan Inrinni khan Assam, Arunachal Pradesh leh Meghalaya-a political party, zirlai pawl leh civil socie­ty group aiawhte chu Citizen­ship Amendment Bill (CAB) chungchang a sawipui. 

Amit Shah hoa meeting neihnaah hian Assam chief minister Sarbananda Sono-wal, Arunachal Pradesh chief minister Pema Khandu, Meghalaya chief minister Conrad Sangma, union minister Kiren Rijiju leh MP eng emaw zat an tel. 

Assam CM Sarbananda Sonowal chuan meeting an neih hian CAB chungchanga hlauhthawnna an neihte pawh a tihbo phah thei ngei dawn niin a sawi. Meeting-a telte chuan sorkar laipuiin hmarchhak bial leh a michengte himna a ngaih pawimawh zia an hrechiang hle ang, a ti. 

Regional party leh civil society groupo te chuan CAB hi hmarchhak biala cheng tribal mite a nghawng theih dan hrang hrangte an sawichhuak. 

Amit Shah chuan Citi­zenship Amendment Bill chuan Inner Line Permit (ILP) system hman mekna leh Constitution Sixth Schedule hnuaia awmte chu a nghawng dawn lo nia sawi a ni. 

Assam minister Himanta Biswa Sarma chuan civil society group tam zawk chuan CAB hmasa hi dodal mah se, siamṭhat a ni hnuah ILP hmanna leh Sixth Schedule hmanna bialte chu a huam dawn lo niin a sawi bawk. 

Arunachal Pradesh chief minister hlui Nabam Tuki chuan 2016 bill kha an dodal a, mahse ILP hmanna state-te huam tel lo tura siamṭhat a nih chuan bill chungchanga an ngaihdan chu ngaihtuah ṭhat leh theih a ni tur thu a sawi. 

BJP kaihhruai National Democratic Alliance (NDA) chuan Parliament thlasik ṭhut­khawmah CAB hi pharh leh ngei a tum a, mahse hmarchhak state hrang hrangah dodalna a nasat avangin Home Minister hian Zirtawpni leh Inrinni khan hmarchhak state hruaitute chu meeting a neihpui a, vawiinah pawh meeting an nei leh ang.

Share this Post