Assam-in Oct 2 aṭangin Arunodoi scheme kalpui dawn

Assam sorkar chuan state chhunga chhungkaw nuai 17 vel hnena ṭan­puina sum pekna tur,  Arunodoi scheme chu October 2 aṭangin kalpui ṭan a tum. 

Finance minister Himanta Biswa Sarma chuan he scheme hnuaiah hian chhungkaw thlan bikte chu thla tin an ei leh in mamawh an leina tur, Rs 830 pek ṭhin an ni dawn tih a sawi. Ṭanpuina sum pek hi chhungkaw mamawh dan azirin pek belh theih a ni bawk ang. 

He scheme hi Assam-a Direct Benefit Transfer scheme lian ber a nih thu a sawi. Minister chuan scheme hnuaia ṭanpuina dawng tur hi assembly constituency tinah chhung­­kaw 15,000 - 17,000 vel an awm dawn tih a sawi. State sorkar hian hemi atan hian thla tin cheng vaibelchhe 210 vel a seng dawn a ni. 

Ṭanpuina dawng thei tur chhungkua hi August 17 aṭangin thlan ṭan a ni dawn a, sorkarin sum a pek tur hi chhungkaw hmeichhe member hminga pek niin, an bank account-ah thunsak ṭhin a ni ang.