Chak mamawh Aizawl FC leh Mumbai inhmachhawn dawn
Mumbai FC coach Khalid Jamil-a'n, "Khualmualah kan khel ṭha lo tih ka pawm a, Aizawl FC hi kan khelh ṭhat bul ṭanna atan hman kan duh a ni," a ti a - vawiin chawhnu dar 2:00-a Aizawl FC nen an inhmachhawn hunah chak ngei an tum.
Aizawl FC-in kar hmasa Inrinni khan Rajiv Gandhi Stadium, Mualpuiah Shillong Lajong an inhnehtawkpui a. Point khat hlawh chhuak mah se inkhel entu Mizo mipui ten chak ngei an duh a, Aizawl FC an auel hial - Mizo club-in insiamṭhat an mamawh tih a lang.
Team dinhmun
Aizawl FC-in I League match sarih an khelh tawh aṭangin point nga chiah an hlawh chhuak a, team pakua awmna I League-ah pariatna an ni mek.
Mizo club tan season thara I League khel zel turin chak a ngai a, an hnuai chiaha awm DSk Shivajians an relegate theih loh avangin an dinhmun a chhe hle. Vawiinah insiam-
ṭhatna remchang an nei dawn e.
Mumbai FC-in an khelmualah record nei ṭha mah se khualmuala an result erawh inchhuanna tur an nei lo. Lajong an draw hnuah DSK Shivajians leh Sporting Goa an hneh lo.
Maharashtra club hian vawi sarih inkhel an hmachhawn tawhah point kua hlawh chhuakin pangana dinhmun an luah mek a, Mohun Bagan leh East Bengal an draw bakah Bengaluru FC 2-0 a an hneh theih avangin an chhe lo.
Tu te nge khel dawn?
Aizawl FC-in tlarhma lama player an neih ṭhat tawk lohzia hriain Yinka Joel Sunday Ayeni an la lut a, Nigerian striker hian Mumbai FC an hmachhawn hunah inkhel bul erawh a ṭan dawn lo.
Mizo club coach Jahar Das chuan a striker thar chungchang hi sawiin, "Inkhel bul ṭan nghal turin a la fit tawk lo a, insiam-rem nan hun a la mamawh a ni," a ti.
Aizawl FC tana chanchin lawmawm chu Mumbai FC captain Taisuke Matsugae inlan thei lo tur hi a ni. Japanese midfielder hi hliam vangin Sporting Goa an hneh loh ṭum pawhin a inlan tawh lo.
Hetih rual hian Aizawl FC tan ngaih-ngam taka awm ngawt a thiang chuang lo. Mumbai club-in season hmang ṭha tak Arata Izumi, winger tlan chak Jayesh Rane, North Korean centre-back ṭha Min-Chol Son, Indian midfielder tawnhriat ngah NP Pradeep leh Steven Dias bakah Sporting Goa laka goal hnih khungtu Sushil Singh-te an kawl a, an squad en chuan an ṭha zawk.
Jamil-a thukhawchang
Mumbai FC manager Khalid Jamil chuan, "Aizawl hi Mumbai nen a boruak a inang lo a, mah se kan talbuai phah loh ang. Kan khelh ngai lohna hmun ni mah se a boruak hi nuam kan ti a, nuam ti takin kan khel ang," a ti.
India international midfielder hlui Jamil chuan, "Aizawl FC hian result ṭha nei lo mah se an khel ṭha ṭhin a, coach an ban hnua an match hmasa berah pawh khan danglamna a awm tam lo," tiin Mizo club chu an ṭhat thu a sawi.
Ṭantu mamawh Aizawl FC
Aizawl FC-in an khelmualah match li an khel tawh a, inkhel entu ten khelmual chhungah player-te an au phur tawk lo.
Mizo club manager Jahar Das chuan, "Season tharah I League kan khel leh dawn tih hi Mizo mipuite ka tiam a ni. Mahse, mipui tam zawkin min ṭawiawm hi kan phut a, inkhel entu tam tak min pe ula, result ṭha tak ka pe ang che u," tiin Mizo mipuite a cho a, result ṭha nei turin mipui ṭawiawmna a pawimawh thu a sawi.
Aizawl FC ṭantu tan inlum aṭanga result ngaihven mai a tawk lo a, Mizo club-in Mualpuiah result ṭha hlawh chhuak turin
ṭawiawmtu tam zawk leh awmze neia au tur mipui an mamawh - an mamawh takzet!