Manipur-ah nawrh huaihawt chhunzawm

Naga peace talk neih mek chung changah Manipur-ah nawrh huaihawt chhunzawm zel a ni.

Sorkar laipui leh Naga helpawl, Nationalist Council of Nagaland-Isak Muivah (NSCN-IM) ten inremna siamin Manipura a nghawng duh lohna lantirin Coordination Com­mittee on Manipur Integrity (COCOMI) buatsaihin ni eng emaw zat chu nawrh huaihawt a ni tawh. 

COCOMI coordinator Sunil Karam chuan union home ministry-in inremna ziahfel a nih hmain Assam, Arunachal Pradesh leh Manipur-a stakeholder-te biakrawn phawt an ni dawn tih a sawi chuan Manipur mipuite rilru a tichiai hle tih a sawi. Karam chuan October 31 khan sorkar laipui leh NSCN-IM hi an inbe tel tawh a, hetihlai hian sorkar laipui chuan stakeholder-te biakrawn an ni dawn a la ti reng tho a ni, a ti. 

"Sorkar laipui hian state mipui min bum leh ngei niin a lang," tiin Karam chuan a sawi. October 31-ah Naga peace talk hmawrbawkna an nei tawh chungin, tun thlengin inremna an siam dan kimchang chu Manipur sorkar chuan a la hre thei lo tih a sawi. 

Manipur mipuite chu inremna an siam chungchang hi ngaihven reng tura chahin, COCOMI leh Manipur mipuite chuan an state ṭhendarh thei zawnga inremna siam chu eng kawng mahin an pawm thei ngai dawn lo tih a sawi nghal bawk. An ram chin khawih tel a nih chuan, an ram venghim tura inpeih turin state mipuite chu a chah. 

Karam chuan state sorkar hnenah pawh sorkar laipui hnenah Naga helpawl nena inremna an siam dan kimchang chu zawtfiah turin a nawr a, mipuite rilru nuamloa an awm reng avangin hriatfiah thuai a ṭul a ni, a ti. 

COCOMI chuan nimin khan rally an huaihawt leh a, Novem­ber 8 leh 9 hian zirna in hrang hrangah leh kawtthlerah 'human chain' siam an tum bawk. 



Share this Post

Login to comment
No Comments