Assam-ah Rs Vbc 5,000 an invest dawn

Assam Industry Minister Siddique Ahmed chuan Indo-European Chamber of Commerce in Assam-ah cheng vaibelchhe 5,000 hu investment an kalpui dawn tih a sawi. Hemi atan hian Assam sorkar leh Indo-European Chamber of Commerce chuan February 29 ah inremna an ziak ang.

Ahmed chuan hemi chung-chang hi Chief Minister hoa ngaihtuah fel a ni tawh tih sawiin, CM hian company-te hi theihtawpa an puih tur thu a tiam a ni, a ti.

Cape Town-a hmunpui nei Solar Capital chuan Assam ram chhunga nizung chakna MW 25 pechhuak thei tur khawl an din dawn a ni. An inbunna hmun tur hi CM in a tifel ang a, Gauhati khaw daifemah pakhat an bun tel ang. Ruahmanna a kal fuh chuan secretariat pumpui hi nizung chakna hmanga chawm a nih an beisei tih Ahmed chuan a sawi.

Assam Industry minister sawi zel danin, Assam ram chhungah hian Green industrial park pali din a ni dawn a, hemi atan hian Rs vaibelchhe 2,000 sen tura ruahman a ni. Loneitute chherhriamna tur Krishi Vikas Kendras 300 din a ni bawk ang a, hei hian mi 20,000 tan eizawnna a siam sak dawn a ni.

Rampawna company liante hian industry tenau (Micro industry) 40 zet an din ang a, sorkar laipui nen an thawkho zel dawn a ni tih minister chuan a sawi. Assam rama inbun thar turte nia Industry minister in a sawi - Britannia Industries Limited chuan Kamprup district ah cheng vaibelchhe 143 sengin thil siamna an din ang a, ram acre 21 a zauah inbunin ṭhalai 500 chuang tan eizawnna a siam dawn a ni. JVL Agro Industries Ltd chuan Palashbari-ah thil siamna cheng vaibelchhe 200 senga siamin, mi 5000 tan eizawnna a pe ang. Emami pawhin Assam-ah hian hmun hnih - Amingaon leh Dadara ah, ram acre 65 a zauah an inbun ang. Plastic siamtu company lian pawhin Tinsukia-ah cheng vaibelchhe 94 sengin thil siamna an din ang. Harinagar leh Phulkandi-ah border trade centre hawn thar a nih theih nan sorkar laipui hnenah dilna an thehluh thu minister hian a sawi bawk.