Assam: 2021 aṭangin fa pahnih aia tam neiten Sorkar hna an hmu thei tawh dawn lo

Assam chief minister Sarbananda Sonowal kaih­hruaina hnuaia Thawhṭanni zana cabinet meeting chuan January 1, 2021 aṭangin fa pahnih aia tam nei tan sorkar hna pek tawh lohna tur policy a duang.

Mihring pung chak tur venna tur ngaihtuaha an ṭhutkhawmnaah hian fa pahnih aia tam neite tana sorkar hna pek phal tawh lohna tur policy hi an duang tih Chief Minister Office chuan a tarlang a, hei hi sorkarin chhungkaw member tlem, fa pakhat emaw pahnih emaw awmna,  'small family norm'  a siam nen pawh a inzul nia tarlan a ni bawk.

September 17 khan Assembly chuan “Population and Women Empowerment Policy of Assam” an lo pawm tawh bawk a, hemi hnuaiah hian 'small family norm' chawilarte pawh a tel.

Assam-ah hian chawhrualin chhungkaw khat member tam zawng hi 5.5 anga chhut a ni a, heihi 'national average' aiin a sang. State zawng zawngah 'maternal mortality ratio' an nei chhe ber a, 'infant mortality rate' an nei sang hle bawk.

Cabinet meeting chuan 'land policy' thar kalpui an rel bawk a, hemi hnuaiah hian ram leilung fa, ram nei lote chuan thlai chinna turin 3 bighas (43,200 sq ft vel) an neih theih dawn bakah in sakna tana bigha chanve vel an nei thei bawk ang. 



Share this Post

Login to comment
No Comments