Eirute chu jail-ah dah zel an ni ang : Tripura CM

Tripura chief minister Biplab Kumar Deb chuan a kaihhruai sorkar chuan eirukna umbo turin chak takin hma a la zel dawn a, eiruknaa inhnamhnawihte chungah action na taka lain, jail-ah tantir zel an ni ang, a ti. 

CM Deb chuan eiruknaa inhnamhnawih chu eng mi pawh niin, biru kual mah se, danin a chungah ro a rel dawn a, an biru hlen thei dawn lo tih a sawi. A hminghmerhin sawilang lo mah se, hei hi PWD minister hlui, court-in bail dilna a hnawlsak hnua biru, Badal Chowdhury a sawina a ni. 

CPI-M hruaitu, Chowdhury hi minister a nih laia project thawhna tur tender dik lo taka kalpui a, sum tam tham tak tihchingpen chungchangah man tuma zawn mek a ni. 

A bail dilna hi West Tripura district and sessions court judge Sabyasachi Datta Purkayastha chuan a hnawlsak a, hemi hnu hian Tripura High Court-ah a thehlut leh a, nimin khan ngaihtuah a ni ang. He thubuai kaihhnawihah hian PWD chief engineer hlui Sunil Bhowmik chu man a ni tawh a, chief secretary hlui YP Singh pawh man tuma zawn mek a ni bawk. 

Tripura CM hian Pathianni khan Agartala-a Maharaja Bir Bikram Airport aṭanga Guwahati, Kolkata, Delhi leh Imphal-a Air Asia flight service chu a vailiam bawk. He hunah hian Transport minister Pranajit Singha Roy, Air Asia CEO Sanjay Kumar leh AAI Regional Executive Director Sanjiv Jindal-te pawh an tel. 

Air Asia flight service tir a nih leh avangin MBB Airport hi hmarchhak biala airport lun ber pahnihna a ni ta a, October thla tir lam khan Agartala-Delhi direct flight service tir a lo ni tawh bawk. 



Share this Post

Login to comment
No Comments