Assam leh Sikkim-ah by-election nei

Assam-a Assembly constituency pali- Jania, Sonari, Ratabari leh Ranga­para-ah nimin khan by-election neih a ni.

Zing dar 7 aṭangin vote thlak ṭan a ni a, constituency tinah hian candidate 40 awmin vote thlak thei mi nuai sarih vel an awm bawk.

Seat pathum hi Bha­ratiya Janata Party (BJP) Legislator - Pallab Lochan Das (Rangapara), Topan Kumar Gogoi (Sonari) leh Kripanath Mallah (Rata­bari)-te Lok Sabha inthlana an chak tak avangin a ruak a, Das leh Gogoi hi Assam sorkara minister nilai niin, Mallah hi Assam Legislative Assembly-a deputy speaker ṭhin a ni thung.

Jania-ah pawh hian Congress MLA nilai Abdul Khaleque chu Barpeta Lok Sabha constituency-a thlan tlin a nih bawk avangin by-election hi neih a ngai a ni.

Sikkim

Sikkim-ah pawh constituency pathumah inthlanna nei ve bawkin zing dar 7 aṭangin vote an thlak.

East Sikkim district Martam-Rumtek constituency, South Sikkim district-a Poklok-Kam­rang constituency leh Gangtok-ahte inthlanna an nei a ni.

Candidate zingah hian chief minister nilai, SKM president Prem Singh Tamang pawh a tel a, ani hi Poklong-Kamrang-ah a ding.

Martam-Rumtek-ah hian candidate pasarih an awm a, Gangtok-ah hian candidate paruk awmin sports icon Bhaiching Bhutia pawh heng zingah hian a tel.

Sorkar lai SKM chuan Gang­tok leh  Martam-Rumtek-ahte candidate an siam lo a, BJP an thlawp thung ang. 



Share this Post

Login to comment
No Comments