AP Governor leh MLA lungawilote an thawkho : Congress

Arunachal Pradesh-a Congress hruaitute chuan Governor J P Rajkhowa leh an party-a MLA titau te chuan BJP sorkar siam tumin hma an la ho niin an sawi. Supreme Court-in President rule-a puan an nih chhan a ngaihtuah hma in Governor leh MLA lungawilote hian BJP sorkarna siamtumin a rukin hma an la niin AP Congress hotute chuan an sawi.

Congress Legislature Party (CLP) hruaitu Geetartha Darshan Barua leh CM aṭanga chawlhtir tak Nabam Tuki chuan MLA lungawilote huihkhawmtu Deputy Speaker T N Thongdok chuan Governor hnenah Law Department kaltlangin AP-ah hian President Rule puan ni ta se Deputy Speaker hna chelh chungin Speaker hna a kawp thei dawn em tih a zawt niin an sawi.

Governor hnena lehkha thawn hian an thawhdun zia a tilang nia an ngaih thu sawiin, Supreme Court thuchhuak pawh nghak loa BJP ṭanpuina hmanga sorkarna siam an tum ber tih Barua hian a sawi a ni.

Congress MLA zingah lung-awilo an awm avangin MLA 60 awmna AP chu President rule-ah January 26 khan puan a ni. MLA lungawilo 21 te hi BJP MLA te leh Independent MLA pahnihin an thlawp a ni. MLA hel, lungawilote hian Speaker Nabam Rabia chu an paihthla a, a hnuah Nabam Tuki chu CM
aṭangin an paihthla leh a ni.