Bangladesh kaltlangin NE tan Gas lakluh tum

Sorkar laipui chuan Bangladesh kaltlangin hmarchhak state-te tan Liquified Petroleum Gas (LPG) thawn luh a tum.

Bangladesh hian India hnenah a ram chhunga bungraw lian tham thawn luh a lo phal tawh a ni. Tripura-a Palatana hmuna ONGC Tripura Power Co.in kawlpetha an siamna hmuna hman tur bungrua chu phurh luh niin, a hun takah hawn a nih theih phah a ni.

Union Petroleum Minister Dharmendra Pradhan chuan Inrinni khan Bangladesh Prime Minister Sheikh Hasina energy adviser Tawfiq-e-Elahi Chowdhury chu hmuin insumdawn tawnna leh tuialhthei laihchhuah dan turte an sawidun.

Union minister hian Bang-ladesh kaltlanga hmar-chhak state chan tur LPG thawnluh hi a remchang ber tih sawiin, tuialhthei laichhuaktu India company-te chuan Bangladesh rama oil zawn leh thlitfim hna thawh an chak thu a sawi.

Ram pianhmang awm dan vangin ram pahnihte tan hian sumdawn tawnna kawnga thawhhona ṭha neih hi a awlsam tih minsiter chuan a sawi a, hmarchhak bial tan West Bengal aiin Bangla-desh aṭanga bungraw lakluh hi a samkhai zawk a ni, a ti. India hian khawchhak lam, Myan-mar leh Thailand ramte kalpawh nan Bangladesh-a Chittagong lawngchawlhna hmang ṭangkai a duh bawk a ni.

Pradhan hian Sri Lanka deputy minister of Petroleum Resources Development Anoma Gamage chu a hmu bawk. Ram hruaitu pahnihte hi Pathianni-a Prime Minister Narendra Modi-an Indian Oil Corp.’s (IOC) in Paradip hmuna tuialhthei thlitfimna an siam thar, Cheng vaibelchhe 34,555 senga siam chu a hawnnaah an tel nghal bawk.

Paradip tuialhthei thlit-fimna hawn thar hian kum khatah tuialhthei tonne maktaduai 15 zet a siamchhuak hman dawn a ni. India chu Bangladesh-a tuialhthei thawnchhuaktu a ni nghal ang. Pradhan chuan Bangladesh hmuna sumdawnna ruhrel lian din a nih tur thu a sawi.