Vanglaini - Tripura HC-in political party-te Vantlang bungrua an kawl chungchang thlen turin a ti

KHAWTHLIR

Secretary puitling

Appointments Committee of the Cabinet chuan Mizoram sorkara chief secretary ni mek Lalnunmawia Chuaungo chu sorkar laipuia secretary puitling (rank)-ah a hlângkai. Lalnunmawia Chuaungo hi 1987 batch IAS, Gujarat cadre a ni.

Thisen pe

Mara Thyutlia Py (MTP) Siaha College Vaih Branch chuan MTP Day pualin nimin khan Siaha District Hospital tan thisen unit 34 an pe a, a petute mipa 24 leh hmeichhia 10 an ni.

Zote S-in lawm

Zote South khua chuan hun rei tak chhung Lunglei district-a an awm hnuah, tun hnaia Mizoram sorkarin Serchhip district-a a dah chu nimin khan an khaw community hall-ah an lâwm.

NBHM siam thar

National Board for Higher Mathematics (NBHM) chuan Mizoram tan bik NBHM Mizoram Region a siam thar a, Mizoram regional coordinator atan Dr LP Lalduhawma a ruat nghal bawk. Dr LP Lalduhawma hi Pachhunga University-a assistant professor a ni.

Environment Awareness

UPC North East India chhunga Aizawl East District PYD hnuaia Environment Committee leh ASEP chuan October 8, Thawhlehni zan khan Bawngkawn UPC Kohhran Hall-ah Environment Awareness Campaign an buatsaih a, pastor bial hrang hrang aṭangin PYD hruaitu mi 150 vel an tel.

Tripura-a awm hlen turin duhsak

MPC party chuan thuchhuah siamin, Bru-te chu anmahni duh thu ngeia Mizoram chhuahsantute an nih thu an tarlang a, "Mizorama lo kîr duh tawh loa Tripura-a chàm hlen duh zawktute hi an duhthlanna ang ngei hian Tripura-ah chêng hlen mai se kan duhsak hle a ni," an ti. Bru-te'n Mizorama an duhthála an khawsak theihna tura phût an neihte chu Mizo hnam leh sakhaw tana him lo thei a nih avangin, tihhlawhtlin chia an ngaih loh thu an puang bawk.

Project training

Lawngtlai DC Shashanka Ala hmalaknaa Lawngtlai district-a 'Kan sikul, kan huan' project kalpui mek thawh hnihna (phase-II) atana thlan sikul leh anganwadi centre-a zirtirtu leh thawktute tan nimin khan Lawngtlai district-a RD block hrang hrangah hmalak dan tur inzirtirna buatsaih a ni.

DAWNTISEI

Tripura HC-in political party-te Vantlang bungrua an kawl chungchang thlen turin a ti

Tripura High Court chuan thupek tichhuakin Communist Party of India- Marxist (CPI-M), Bharatiya Janata Party (BJP) leh Congress-te chu dan loa vantlang bungrua an kawl, an ta nia an chhalte chu affidavit siama kimchang taka ziaka thehlut turin a ti.

Chief justice Sanjay Karol leh justice Arindam Lodh-te kaihhruai bench chuan suo motu PIL lain political party-te bungraw kawl chungchang kimchang hi hriat a duh a ni.

Court chuan Tripura sorkara revenue department secretary hnenah pawh political party-ten bungrua, ram leh thildang an kawl chungchangah hian affidavit thehlut turin a ti bawk.

Bishalgarh Sub-division-ah bungrua 24 lai heng political party-te hian dan loin an kawl tih hriatchhuah a nih hnuah court hian affidavit hi a phut a, November 25-ah hearing neih a ni ang.

Share this Post

Login to comment

No Comments