Jose Mourinho a kal zel

Jose Mourinho-a'n AS Roma-a a hnathawh sawiseltute a chhanlet hnua a match hnihnaah Italian club hi hnehna a chanpui leh a, Ningani zan khan Europa League match-ah an mikhual Servette chu 4-0 ngawtin an sawp - Roma tan Romelu Lukaku, Andrea Belotti leh Lorenzo Pellegrini ten goal khat ṭheuh an khung.

Kar hmasa lawk khan Mourinho hian khawvela coach hlawh hnem ber ni tura sawmna a hnar thu a sawi a, Portuguese coach chuan, "Thla thum liam ta kha chuan Roma chhuahsan ta ila, chhiat rupna ang hialin an sawi ang.

"Season chawlh lai khan football chanchina coach-in sawmna a dawn tawh a zawnga hrawl ber ka dawng a, mahse, players, fans leh club neitute hnena ka lo intiam tawh avangin he sawmna hi ka hnar. Thla thum a liam a, club buai chhanah min puh leh ringawt - ka tan pai dam theih a ni lo," a ti a, a lawm lo hle.

Mahse, Mourinho hian amah sawiseltute a chhanlet hnuah Roma hi match hnih a kaihruai a, league-ah Frosinone chu 2-0 a hnehin, Europa League-ah a chakpui leh ta bawk - Pathianni zan dar 9:30-ah Serie A match khel turin an inlan zui dawn a, Serie A kai thar, Claudio Ranieri enkawl Cagliari an mikhual ang.