Vanglaini - Gauhati HC chief justice atan Justice Ajai Lamba lalut

KHAWTHLIR

Tlân theih loh

Aizawl SP Rodingliana Chawngthu chuan thupek chhuahin, vawiin aṭanga October 12, Inrinni thlengin zing dar 9 leh tlai dar 4:30 inkarah Upper Republic Presbyterian Kohhran biak-in chhak aṭanga Raj Bhavan south gate inkar kawngah lirthei tlan theih a ni dawn lo tih a tarlang. He kawngpui hi PWD-in an siamṭha dawn a ni. Thupek hian chhiatrupna thil, kângmei leh rîkrum kaihhnawiha duty, dan leh thupek pawimawh bika magistrate leh police-te chêt velna erawh a huam lo.

MHIP-in an dem

MHIP sub-headquarters, Mamit chuan thuchhuah siamin, PC Lalringliana, 4th IR Battalion, Zawlpuia miin a nupui Lalhlimpuii (43) nasa taka a sawisak vanga a thi chu pawi an tih thu an tarlang a, "He thihnaa mawhphurtu PC Lalringliana hi dan anga a chungthu ngaihtuah tur leh a phû tâwk hremna pe ngei turin thuneitute kan ngenin kan phût tlat a ni," an ti.

Zirlai chawimawi

MZP Sub-Headquarters, Reiek chuan nimin khan an khuaa Tourist Lodge Convention Centre-ah zirlai chawimawina hun an buatsaih a, minister R Lalzirliana'n a hmanpui. Minister chuan, "Tunlaiah sorkar hnathawh tur a váng tawh tiin mi tam takin sawi ṭhin mah se, sorkar chuan mi thiam tak tak a la zawng reng. Politics aṭang ringawt chuan hnam humhalh a harsat ṭhin avangin, a sorkar enkawltu a neitu sorkar hnathawkah hnam hmangaih mi an tam leh zual a ngai," a ti. Reiek MZP-te hian graduate thar mi pariat an chawimawi a ni.

Minister-in enfiah

Sports & Youth Services minister Robert Romawia Royte chuan nimin khan Kolasib Saidana Regional SAI Centre siam hna thawh mek a tlawh a, hna thawh dan a enfiah. U-14 Subroto International Football Tournament 2019 Champion team-te nen an inkawmnaah Sports Minister chuan, "Minister leh sorkar milian pui puite aiin infiammite hmuh nuam ka ti zawk ṭhin," a ti a, sorkar tharin infiammite chu kawng laklawhah tawpsan mai loin, an theihna tàwp thlenpui zel a tum thu a sawi.

DAWNTISEI

Gauhati HC chief justice atan Justice Ajai Lamba lalut

Gauhati High Court chief justice atan Thawh-ṭanni khan Justice Ajai Lamba chu rinawmna thu tiam tira lakluh a ni.

Governor Professor Jagdish Mukhi chuan Guwahati-a Raj Bhawan-ah Justice Lamba hi rinawmna thu a tiamtir a ni. He hunah hian chief minister Sarbananda Sonowal leh sorkar mi pawimawh eng emaw zat an tel.

Justice Ajai Lamba hi Allahabad, Punjab and Haryana High Court judge hlui a ni. Kum 1958, September 21-ah a piang a, Chandigarh-a Government College aṭangin English Honours degree a nei a, hemi hnu hian Punjab University, Chandigarh aṭangin L.L.B Course a zo leh a ni.

Kum 1981-ah advocate niin, kum 2006 March thlaah Punjab and Haryana High Court judge-ah hlanlai a ni a, kum 2011 Dec. thlaah Allahabad High Court-ah sawn a ni.

Share this Post

Login to comment

No Comments