Arunachal Pradesh sorkar chuan eirukna umbo tuma a hmalaknaah, eiruk vanga thiam loh chang officer-te chu CCS rule 56(j)  hnuaiah pension-a chawlh tir zel an ni dawn tih a sawi. 

Chief minister Pema Khandu chuan eirukna umbo tura sorkar hmalak dante sawiin, eiruknaa inhnamhnawih tupawh hriatchhuah chu dan ang takin an chungah ro rel sak zel an ni ang, a ti. 

Sokar official, con­trac­tor-te hnen aṭanga thamna la leh pek phutte chu hrem lohin chhuah an ni dawn lo a, CCS rule 56(j) hnuaiah chawlhtir an ni zel dawn a ni, tiin a sawi. 

Central Civil Services (Pension) Rules, 1972-a section 56(j) hmang hian sorkar hnathawkte chu an hnathawh dan enfiah a nih hnuin, mipuite tana ṭha tur zawk a nih chuan an hna thawh chhunzawm tir zel emaw, pension-a chhuah tir emaw a theih a ni. 

CM hian September khan PWD engineer-te chu meeting neihpuiin, dik tak leh langtlanga hna kalpui turin a ngen. Hei bakah mimal leh chhungte duhsak bik nei lo tura chahin, an hnathawhte chu khawtlang mipuiten an chhawr ṭangkai leh an hlawkpui theih dan tur ber anga thawk ṭhin turin a ngen. 

AP Chief Minister hian social media site lamah pawh state mipuite hnenah ngenna siamin, official eirute chu CM office-ah report zel turin a chah a ni. 

Share this Post