Arunachal Pradesh-a India leh China inrina, Line of Actual Control (LAC) bula India sipaite artillery firepower thuam chakna turin Indian Army chuan M777 Ultra-Light Howitzers ralthuam dah turin ruahmanna an siam.

China president Xi Jin­ping chuan karleh lamah hian India rawn tlawh a tum a, hemi dawn hnaiah India-in a ralthuam ramri bula dah belh a tum tih tarlan a ni leh hi China chuan a helh leh viau rin a ni.

India sipaite chuan AP-ah hian 'mountain combat exercise'- Him Vijay a nei mek a, hei ringawt pawh hi China chuan an dodal hle tawh nia sawi a ni bawk.

Sipai official-te chuan Howitzers dah tur chu thil thlak danglamtu tur a nih thu an sawi a, kumin kum tawp lamah chuan dah hman an tum tih an sawi bawk. M777 Ultra-Light Howitzers hi Tawang, Kameng leh Walong-ahte dah tura ruahman a ni a, official-te chuan artillery regiment chu M777 hman dan hi zirtir an ni ṭan tawh tih an sawi a ni.

M777 howitzer

M777 hi BAE Systems' Global Combat Systems siam­chhuah a ni a, United Kingdom lam aṭanga siamchhuah ni mah se US pawhin siamchhuahna turah hian tha a thawh hlawk hle.

Digital fire-control system hmangin Australia, Canada, India leh Saudi Arabia-te chu US leh UK bakah hian a hmang ṭangkaitu an ni. Afgha­nistan leh Iraq indonaah pawh nasa takin hman a ni bawk.

India chuan November 2016 khan M777 145 leina turin cheng vaibelchhe 5,070-in inremna US a ziahpui. US hian 25 chu India hnenah hian a hlan hmasa a, a dang 120 erawh chu India rama remkhawm tur a ni thung. 

Share this Post