Vanglaini - Rijiju-a'n Meghalaya a thlawp dawn

KHAWTHLIR

Heroin kg. 1.09 man

Mizoram Police-te chuan nimin tlai khan Zokhawthar aṭanga lo kal pick up truck MZ/01 N - 7137 aṭangin Tuikhurhluah heroin kg. 1.09 an man a, motor-a chuang Thangliana (37) s/o Bawiliana, Myanmar leh Zoliansanga (45) s/o Kaithanga, Khuangleng khuate an man. Thudawn danin, Tuikhurhlua police duty-te chuan motor hi lo tihdin an tum a, mahse an tlan tlang lui a; police-te chuan motor hi um zuiin km. 1 hnu velah an umpha a, an man ta a ni.

Centenary lawm

Venghnuai Presbyterian kohhran chuan nimin khan an hall-ah an kum 100 (Centenary) tlin lawmna atan free clinic leh thisen pek runpui an buatsaih. Free clinic-ah hian Venghnuaia doctor-te'n damlote an en a; thisen pek runpuiah hian mipa 18 leh hmeichhe pathum, an vaiin mi 21 in Aizawl Civil Hospital tan thisen unit 21 an pe. Venghnuai kohhran hian June 2 aṭang khan centenary hi an lawm ṭan a, a lawmna pui ber chu November 15, 2019 ah an buatsaih ang.

Inthlan chawlh

Mizoram sorkar chhuan thuchhuah siamin, August 30, 2019-a local council by-election neihna tur Chaltlang, Chhinga Veng leh Kanan Venga sorkar hnathawkte'n vote an thlak theihna atan inthlan ni hi heng veng pathum huam chhunga sorkar hnathawkte tan chawlh a nih thu a tarlang.

DC-in hawng

Siaha DC Bhupesh Chaudhary chuan hmeichhia harsatna tawkte tluk luhna tur, One Stop Centre atana hman lailawk tur DC office quarters pakhat chei ṭhat chu nimin khan a hawng. Siaha DC chuan One Stop Centre chu 24x7 hawn a nih tur thu a sawi.

Zirtirtu training

SCERT chuan nimin khan an auditorium-ah high school zirtirtute tan 'Training of Nodal Teachers on Drug Demand Reduction' an buatsaih a; Aizawl district-a high school zirtirtu 34 an tel. He training hi National Action Plan on Drug Demand Reduction, Ministry of Social Justice and Empowerment leh Ministry of Human Resource Development hmalaknaa neih a ni.

DAWNTISEI

Rijiju-a'n Meghalaya a thlawp dawn

Union minister of state (Independent Charge) for sports and youth affairs Kiren Rijiju chuan National Games 2022 host tur Meghalaya chu a theih ang anga a ṭanpui dawn thu a sawi.

Nilaini khan Meghalaya chief minister Conrad K Sangma leh health minister A.L. Hek-te chuan Kiren Rijiju hi New Delhi-ah meeting an neihpui a, darkar khat chuang zet an inkawm.

Conrad K Sangma chuan Rijiju hnenah hian National Games atana Meghalaya inpuahchahna kalpui dan a hrilh a, ruahmanna an siam dante pawh a hrilh bawk. Sum leh pai lamah pawh ṭanpui turin a ngen bawk.

Health minister A L Hek pawhin 2024-a kum 100 tling tur Shillong Golf Course tichangtlung tura ngenna memorandum a thehlut bawk a, Rijiju chuan Meghalaya hmalakna chu a theih ang anga ṭanpui a tiam a ni.

Share this Post

Login to comment

No Comments