February 2016 chhungin scho' sem tum

Mizo Zirlai Pawl (MZP) hruaitute chuan zirlaite scholarship chungchangah nimin khan Mizoram Scholarship Board (MSB) hotute an kâwm a, MSB secretary JH Zoremthanga chuan, scholarship chu February 2016 chhunga sem hman an tum thu a lo hrilh.

MZP hruaitute hnenah hian JH Zoremthanga chuan, December 31, 2015-ah Ministry of Tribal Affairs-in tribal scholarship atan Mizoram zirlaite tan Rs. 49,27,90,600 a rawn pe chhuak a, release order hi January 7, 2016-ah MSB-in a hmu chauh a ni,” a ti.

MSB Secretary sawi danin, post matric scholarship-ah Mizoram sorkarin 10% a tum dawn a, chu chu MSB chuan Planning leh Finance department-ah an dil mek. Sorkar laipuiin sum rawn pe tawh mah se, Mizoram sorkarin a tum tur a tihfel hma loh chuan sum faiin an pe thei lo niin a sawi.

MSB hotute sawi danin, post matric scholarship hi MSB chuan February 2016 chhunga sem hman an tum a; kum hmasa lamah scholarship pek nawn a tam avangin, chutiang chu a thlen tawh loh nan bank thuneitute nen sawiho a, felfai taka sem an tum a ni.

Minority scholarship bik chu online (internet) hmanga dil a nih avangin sorkar laipuiin phût neuh neuh a nei a, dilnaa document fel lo tam tak an hnâwl niin MSB hotute chuan an sawi.

MZP hian nimin khan an Pisapui chu kum 2016 atan an hawng a ni.