State dang atangin vawk 4,183 la lut Vawk lak luh phal hun hawn a tâwp

Mizoram sorkarin India ram state dang, Porcine Reproductive and Respiratory Syndrome (PRRS) leh African Swine Fever (ASF) lèn lohna aṭanga vawk leh a notê lak luh theih hun a hawn chu nimin khan a tawp a; October 24, 2019 aṭanga January 31, 2020 chhungin Mizoramah vawk 4,183 lak luh a ni.

Tarlan tawh angin, nikum chhung khan state dang aṭanga vawk lak luh zat hi 4,083 a ni a, January 2020 chhung khan vawk 100 lak luh leh niin, a vaiin vawk 4,183 lak luh a ni. Vawkte chu sorkara vawk lak luh dilna lut zinga phalna pek mi 30-te lak luh a ni.

November 2019 khan mi 22 hnenah vawk 3,155 lak luh phalna pek a ni a, October thlaah mi pali hnenah vawk 525 lak luh phalna pek niin, December thlaah mi pathum hnenah vawk 403 lak luh phalna pek a ni. January 2020-ah dilna thehlut zinga mi pakhat hnenah vawk 100 lak luh phalna pek a ni bawk.

Nimin thleng khan vawk lak luh dilna lut a awm a, mahse, sorkar hun hawn chin a tàwp avangin phalna an pe chhuak lo tih Commerce & Industries department hotute chuan an sawi.