Sulhnu 227 : Zolutin a pi leh pute khua Elgin a thleng ta

Kar hmasa khan Bengkhuaia sal man Zoluti chu Vailianin an laklet dan leh an hawpui ṭan dan kan sawi kha a ni a, kha kha kan chhunzawm ang. Kan thulakna chu Zoram Varṭian a ni zel ang.

Sailam aṭanga Mohammed Azim-an Zoluti a hawn ta kha Buarpuiah, chuta ṭangin Tlabungah Col. Tyler-a hnenah a thlen a. Colonel Tyler-a chuan Mizo lalte hnenah sal chhuahtir tur leh remna siampui tura an kal mek lai a nih avangin an hotute hnen aṭanga thu an dawn tur nghakin Rothangpuia khua Lungsenah Zoluti chu a dahtir ta a nih kha. Chittagong Commissioner hnen aṭanga Zoluti enkawl zel dan tur an nghah chhung, kar khat zet chu Rothangpuia lal inah a nupuiin a lo enkawl a ni. Zoluti hian Mizo naupang zingah intihotu taka Mizo lal ni mai awma Sapho beih dan tur a lo relpui hi Bengkhuaia kha a lo fing hle a ni tih a hriat theih a. A pa thattute lama ṭang thei khawpin a thluak an lo suksak tawh tihna a nih chu. Lal Rothangpuia in luhkapui sei takah chuan vaibel zuin a ṭhu a, Mizo naupang rualin an la hmuh ngai loh Sap naupang chu mak ti takin hmuhnawm enin an lo en a ni.

Hetih lai hun hian Kumpinuin India ram an rawn awp laia an khawpui Calcutta-a Observer chanchinbuin kum 1872, February ni 3-ah chuan heti hian Zolûti chanchin a ziak a. “ Zoluti chu kum 6 mi vel, hmelṭha fe reuh hi a ni a, European hmel leh pianphung dik tak, mitmeng buang thêng mai a ni. Mizo ṭawng lo chu ṭawng dang a hre tawh lo va. Sipai officer-in Zoluti bul a va thlen chuan a ipte aṭanga chithlummum phawrhin a duh leh duh loh a zawt a. Zoluti chuan kum khat lai Sap ṭawng a hman tawh loh avangin atirah chuan a hrethiam mai lo va; mahse, sipai officer ṭawng, a hriat ṭhan fo tawh chu a rilruah a lo lang thar leh a, ‘Give me them’ tiin a kut a dawh ta a ni, tiin.

Rothangpuia ina Zoluti awm chhung hi kar khat a ni a, chung hun chhung chuan a enkawl zel dan tur sawrkarin a ngaihtuah a. Chittagong Commissioner hnen aṭanga thu an dawn hnuah Chittagong-a thawn turin Rothangpuia nupui hnen aṭangin Zoluti chu an hruai chhuak a, chu chu January ni 30, 1872 a ni. Colonel Tyler-a chuan Zoluti chu Tlabung aṭangin lawngin Chittagong-ah a zu thlen a, Chittagong aṭang hian meilawngin Calcutta-ah an thawn ta a ni.

Calcutta-ah chuan James Winchester-a ṭhianpa, Phoenix Flour Mills neitu R.S. Duncan-a chu an aiawha Zoluti lo dawngsawng turin James Winchestera nu leh pain an ngen a. Duncan-a hian Calcutta-ah a lo dawngsawng a, Sap rama thawn dan tur pawh a lo ngaihtuahsak a. A senso zawng zawng pawh a tumsak vek a, March ni 4, 1872-ah chuan London pan tur meilawng lian City of Cambridge-ah Zoluti chu a thawn haw ta a ni. Duncan-a hian lawng chhunga Zoluti enkawltu atan Captain nupui Pritchard-i chu Rs. 100-in a ruai a. Thla hnih an thang hnuah an lawng Captain Smith-a chuan April thla tawpah London lawngchawlhna hmun a thlenpui ta a. London-ah hian Zoluti pamiin a lo hmuak a, Elgin khuaah a hruai haw ta a ni. Zoluti pami hi James Winchester-a unaupa a ni a, London-a Zoluti lo thlen thu leh an lo hmuah thu ziaktu hi Illustrated London News a ni. Elgin khua hi Scotland ram hmar tawp lama awm, North Sea tuipui kama mi a ni.

Scotland rama thlamuang taka a pi leh pute bula a awm hnu chuan Zoluti chu Mizovin sala an hruai dan leh a khawsak zui dante an zawt ṭhin a, engtin vak mah a chhang duh lo. A pa thattu, sala mantu leh kum khat ṭhelh sala kawltu Mizote chanchin chu sawi pawh a duh lo. Rothangpuia leh Mohammed Azim-a ten Sailam aṭanga an hruai haw dawn khan Zoluti lu chu mipa naupang lumeh angin a sam chu chhîng takin an tansak a, a sam chu Mizoten amah hriatreng nan kawl ṭhatah an duh a ni. Hei hi a dik a ni tih kan hriatna chu a thlalakah a ni a, a thlalak chu kum 1872, May ni 25-a Illustrated London News, phek 4-naah a chuang vang a ni.

Alexander Mackenzie-a chuan Report to The Secretary to the Govt. of India, Foreign Deptt., No. 1595, Dated Calcutta, 8th March 1872-a a ziakah chuan Zolutin London pana lawnga a zin senso zat chu, “Lawng chuan man Rs. 300, Captain nupuiin a enkawlna man Rs. 100 leh Zolûti thawmhnaw leina leh ṭul dangte Rs. 200, a vaiin Rs. 600,” tiin. James Winchester-a ṭhianpa Duncan-an Zoluti Sap rama a haw nana a senso zawng zawng chu sawrkar senso tur nia ngaiin Lt. Governor hnenah lehkha a thehlut a, sawrkarin a rûl ta a ni.

Pathian zarah kan dam ang a, kar lehah chhunzawm kan tum ang.