Sulhnu 136: China rama Kaifeng Judate

Kar hmasa khan Judaten China rama baibul an ken luhna kawng chu Silk Road a nih thu kan sawi a, tun ṭumah chuan China rama Judate chanchin leh khaw pakhat Kaifeng an tiha Juda awmte chanchin an sawi ang.

‘History of The Jewish Nation after the Destruction of Jerusalem under Titus’ tih bu, Alfred Edersheim-a ziah kan sawi tawh kha he Kaifeng khuaa Judate khawsak ṭan dan sawina bu kan hmuh a ni a. Wikipedia chuan China rama Judate chu Sephardi Judate leh an thlahte an ni ber a, Ashkenazi Judate, Mizrahi Judate leh a dang tenaute niin a sawi a.

Sephardi hi Hebrai ṭawngin Spain ram tihna a ni a, Iberian peninsul-a Juda awmte sawina a ni. Sephardi Judate hi Sephardim tia koh an ni bawk. Iberian peninsula chu Iberian-ho ram, tuipuia inkhawh chhuak khu a ni a. Grik hovin chu laia mite chu Iberian an tih avangin khawvelin a ti Iberian ve ta zel a. Iberian-ho chu an awm tawh lo va, tuna Spain leh Portugal-in an luah tak khu a ni. Kum 1492 lai khan Spain rama Judate chu Roman Catholic Kristianah an inleh luihtir chiam a, inlet ve duh lo 200,000 chuang emaw lai chu an tlan darh a, Chungho thlah ṭhenkhatte chu China ramah hian an lo chho a ni awm e.

Ashkenazi Judate thung chu Rom lalram chhunga Juda awm darhte an ni a, Ashkenazim tiin an ko bawk ṭhin. Kum zabi sawm tawp lamah han Rom lalram velah an lo inthlah pung viau hman a, Germany leh France ramahte an pem chho zel a, Europe hmar lam leh chhak lamah an inbengbel zui ta a ni. Ashkenazi Judate hi Judate zinga khawvel hriata milar an lo ni hlawm a, Jerusalem khuaa Hebrew University sawi dan chuan tunlai khawvela Judate hi zaa 80 zet chu Ashkenazi Judate niin a sawi. Albert Einstein-a te, American ziaktu lar tak Gertrude Stein-i leh American astronomer leh ziaktu lar Carl Sagan-a te hi Ashkenazi Juda an ni.

Mizrahi Juda ve thung chu Arab Juda an tihte hi an ni a, Mizrahi tih hi Hebrai ṭawnga khawchhakho tihna a ni. Africa khawmualpui laili chhak lam deuha mite leh hmar lama awmte an sawina a ni. Mizrahi Judate hi Africa khawmualpuia mite chauh an ni lo va, Asia khawmualpui laili leh Asia leh Europe zawmtu tlang Caucasus vela mi - Persian Judate, Afghan Judate, Bukharan Judate, Uzbekistan leh Tajikistan te, Dagestan leh Azerbaijan Judate hi an ni. Mizrahi Judate hi Babulon sala an hruai, Persia lalram hnuaia awm hlen tate kha an ni.

Chutiang chuan Juda hlawm hrang hrang - Mizrahi te, Ashkenazi leh Sephardi Judate chu China ramah khian an lo han pem hlawm tawh niin an ngai a. A awm hmasate chu Persia rama Juda sumdawngte niawmin British Library chuan a sawi a, chuti a nih chuan Juda lalram tluk chhiat lai kum BC 587 lama Babulon lal Nebukadnezzara II-in Jerusalem a chhutchhiat a, sala a hruai tak thlahte an ni tihna a ni ang chu.

Kan sawi tum ber Kaifeng Judate erawh chu Han dynasty (BC 205 - AD 226) laia China rama lut niin an ziak a. Kaifeng Judate pawhin kum zabi khatna lai ata lo awm nghet tawh an inti bawk. Kum AD 718 khan sumdawnna lehkha an hmuhchhuahah chuan Persian ṭawng ni si, Hebrai hawrawpa lehkha inziakah chuan Kaifeng khuaa Judate lo awm tawh thu a inziak a ni.

An chanchin an lo ziah dan aṭanga han chhui chhoh zelin kum BC 200 hnu lam deuhah Juda sumdawngte hi Kaifeng khuaah an inbengbel a, kum AD 1850 thleng chuan an chanchin hi chhui theih an ni a. Alexander The Great khan kum BC 332-ah Jeruaslem a lut a, Judate chu a thuhnuaiah an kun ta a. A lalram ropui tak hnuaia Judate an kun aṭanga kum 5 a lo vei leh chuan India ram a run ta a, kum hnih hnuah India hmar lam ram ṭhenkhat chu a la ta a. chu chu BC 325 kha a ni a. Aleksandra Kleczar-i thuziak pakhat The Pagan King before the One God: The Alexander Narrative in Josephus, Antiqutates Iudaicae XI, 8, tihah chuan kum BC 332-a Jerusalem a lak khan Alexander-a chu Jerusalem-a Juda puithiam lal ber Jaddua-a khan a lo hmuak a. Lal ber leh an chunga roreltua an lo pawm thu te lo hrilhin Jerusalem khawpui chu chhu chhe lo turin a lo ngen a. Judate pi leh pute sakhaw vawn chu vawn zui zel phalsak tur te, kum 7 dan, sabbattical year zela chhiah awl leh Babulon leh Media rama Juda pemdarhte pawhin an pi leh pute thuthlung an lo vawn chu vawn zui zel phalsak tur leh Alexander-a sipai rual chu Judaten an zawm ve te phalsak turin a lo ngen a ni. Puithiam lal ber Jaddua-a lo ngente hi Alexander-a hian a phalsak niin an sawi. Judate chu Alexander-a sipai rual zinga an tel ve hnu lawkah India a run ta a, India hmar lam lalte a hneh hnuah a ram chhungah a seng lut a. A kalsan leh daih avangin rorel turin a sipai officer-te a hnutchhiah niin sawi a ni a, a ram hneh chin a zauh em avangin Persia ram leh India ram inkara a ram lakte awp turin a sipai hotu a dah thluah a ni an ti.

Chutianga Alexander-an India ram a run a, a rawn hneh khan awp zui tura sipai hotu a ruat khan hotu chauh ni lovin sipai eng emaw zat kha a hnutchhiah tel lo thei lo va, chung zingah chuan Juda sipaite kha an tel ve a ni thei e. Kashmir leh Afghanistan vela Juda lo awmte khu kum 2000 chuang an lo awm tawh niawmin an sawi a, Juda sipai thlahte pawh an lo ni thei a ni. Chu mai ni lovin, Alexander-a thlah intite pawh India ram hmar lamah khuan an lo awm ve bawk a ni.

Chutiang chu a nih avangin historian-te pawhin an chhui fuh vek hlei thei lo va, Asia khawmualpuia Judate lo awm ṭan hi anmahni Judate chuan Isua pian hma kum zahnih emaw lam daih kha nia an chhal avangin hriat fiah a har hle a ni. Chinese historian-te pawhin an sawi fak thei bik lo.

Kan sawi tum ber Kaifeng Judate lo awmṭan leh khawsak chhoh dan pawh hi London-a School of Oriental and African Studies aṭanga zir chhuak Chinese historian Xun Zhou-i chuan Kaifeng Judate hi khawthlang ram khawsak phungin a lo hneh tawhte niah a ngai a, kum 2000 chuang an lo awm tawh niin a ngai bawk. Mizo ṭobul lo chhui fe tawh Zaithanchhungi chuan Mizote chu Juda hnam bo zinga Manase-a thlahte kan ni, a ti a. Kaifeng Judate pawh kum 2012 khan a lo han tlawh chhuak tawh a, anni chu Manasea thlahte an nih thu leh Mizote chu anmahni anga Manasea thlahtea lo pawmin rei tak inhmu tawh lo unau angin an lo lawm hle a ni. Tunah chuan Kaifeng Judate chu Kristian leh Juda sakhua la vuan an inpawlhsawp tawh a, mi tlemte an ni tawh.

Liangkhaian chuan, “Mizo chanchin hriat chian phak loh, kan ngaihruat theih hla berah chuan, Baibul zirtirna thua Nova fate pathum zingah khan Japheta thlah zinga mi chu kan ni awm e”, tiin a lo ziak a. Chhinlung Israel People’s Convention (CIPC) pawlin Juda hnam bo kan ni an tih te, Zaithanchhungin Juda hnam bo Manasea thlah kan ni e, a tih te hi kei chuan sawi tur ka nei lo va. Ka chhui lam a ni hek lo. China rama kan awm lai hian Judate baibul chu kan lo kawl ve tawh a ni thei e, tih thu chhuidawnna chauh a ni ka buaipui chu ni. Kaifeng Judate hian Judate baibul Torah chu an lo kawl ngei a, kan sawi tawh angin zial 15 an nei ṭhin a. Kum 1850 lam thleng kha chuan an la kawl ṭhat chu zial 7 emaw chauh a ni tawh a, zial 8 chu a damkhawchhuak zo ta lo a ni. A damkhawchhuak lo zinga mi chu kan pi leh puten an lo kawl ve kha a ni ang e, tiin kan chhuidawn a nih chu. Thlalak hi Kaifeng Torah zial zinga mi chu a ni.

Pathian zarah kan dam ang a, kar leh lamah Mizote thuziak tih bo chanchin hi chhunzawm leh kan tum ang.